Ба Кумитаи ҳолатҳои фавқулода ва мудофиаи гражданӣ 4500 кило сим барои корҳои соҳилмустаҳкамкунӣ дастрас гардид

ДУШАНБЕ, 15.12.2023 /АМИТ «Ховар»/. Агентии ҳамкории байналмилалии Ҷопон (JICA) ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон 4500 кило сим барои бофтани кубҳои бетонӣ ҷиҳати мустаҳкам намудани соҳили рӯдхонаҳои воқеъ дар манотиқи хатарнок дастрас намуд. Дар ин хусус АМИТ «Ховар» бо истинод ба Кумита хабар медиҳад.

Бояд гуфт, ки дар доираи рушди минбаъдаи ҳамкории судманди байналмилалӣ дар самти пешгирӣ ва рафъи оқибатҳои офатҳои табиӣ, инчунин расонидани ёрии таъҷилӣ ба аҳолии зарардида Кумитаи ҳолатҳои фавқулода ва мудофиаи гражданӣ бо тамоми шарикони рушд ба таври доимӣ ҳамкорӣ менамояд. Яке аз корҳои муҳим дар пешгирии  офатҳои табиӣ анҷом додани корҳои соҳилмустаҳкамкунӣ мебошад.

Бо ин мақсад Кумита лоиҳаи начандон калонеро бо Агентии ҷопонии ҳамкории байналмилалӣ (JICA) дар Ҷумҳурии Тоҷикистон ҷиҳати беҳтар намудани фаъолияти соҳилмустаҳкамкунӣ дар қаламрави ҷумҳурӣ амалӣ намуда, дар оянда низ бо ҳама шарикони байналмилалии рушд дар ин самт ҳамкорӣ менамояд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон