Дар корхонаи «Вахш саноат»-и Кӯшониён 30 номгӯй мототсиклҳои дучарха ва сечархаҳои гуногунҳаҷм истеҳсол мешаванд

ДУШАНБЕ, 15.12.2023 /АМИТ «Ховар»/. Соли 2024 дар ноҳияи Кӯшониёни вилояти Хатлон корхонаи истеҳсоли мототсиклҳои дучарха ва сечархаҳои гуногунҳаҷми ҶДММ «Вахш саноат» ба истифода дода мешавад. Бо мавриди истифода қарор гирифтани ин  корхона ҷойҳои нави корӣ муҳайё мегарданд.

Ёдовар мешавем, ки 14 декабр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Кӯшониён бо лоиҳаи корхонаи истеҳсоли мототсиклҳои дучарха ва сечархаҳои гуногунҳаҷми ҶДММ «Вахш саноат» шинос шуданд.

Корхона дар доираи Солҳои рушди саноат (2022-2026) бунёд мешавад.

Бо бунёди корхона 30 номгӯй мототсиклҳои дучарха ва сечархаҳои гуногунҳаҷм истеҳсол мешаванд, ки беш аз 30 дарсади таҷҳизот ва қисмҳои эҳтиётии онро низ худи корхона истеҳсол менамояд.

Мототсиклҳои истеҳсоли корхона барои хоҷагидорон, сохтмончиён ва дигар табақаи аҳолӣ пешбинӣ шудаанд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»