Конфронси Созмони Милали Муттаҳид соли 2025 дар шаҳри Душанбе барои ҳифзи пиряхҳо дар сатҳи байналмилалӣ заминаи муҳим фароҳам месозад

Декабрь 4, 2023 11:25

ДУШАНБЕ, 04.12.2023 /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар чорабинии канории «Амалҳои ҷаҳонӣ дар самти ҳифзи пиряхҳо», ки 2 декабри соли 2023 дар Аморати Муттаҳидаи Араб баргузор гардид, оид ба обшавии босуръати пиряхҳо, таъсири манфии он ба сатҳи зиндагии аҳолии сайёра, афзоиш ёфтани офатҳои табиӣ, роҳҳои пешгирӣ аз ин равандҳои номусоид изҳори андеша намуданд.

Аз ҷумла, гуфта шуд, ки бо сабаби тағйирёбии иқлим ва баланд шудани ҳарорати ҳаво дар Осиёи Марказӣ масоҳати пиряхҳо босуръат коҳиш меёбад. Дар даҳсолаҳои охир аз 13 ҳазор пиряхи Тоҷикистон зиёда аз як ҳазораш об шуда, боиси афзоиши бесобиқаи офатҳои табиӣ гардидааст. Яке аз натиҷаҳои манфии ин раванд коҳиши манбаъҳои об ва мутаносибан кам гардидани миқдори об дар дарёву кӯлҳо мебошад. Тавре ки маълум аст, пиряхҳо ва захираҳои барфии Тоҷикистон сарчашмаи 60 фоизи обҳои Осиёи Марказӣ мебошанд.

Президенти Ҷумҳурии Тоҷикистон муҳтарам Эмомалӣ Раҳмон пешниҳод намуданд, ки «бо мақсади арзёбии дақиқи таъсири тағйирёбии иқлим ба ҳолати пиряхҳои минтақа омӯзиши ҳамаҷониба ва мониторинги онҳо ба роҳ монда шавад. Бо ин мақсад ҳамзамон зарур медонем, ки имконияти таъсиси Маркази минтақавии мониторинг ва омӯзиши пиряхҳо дар Тоҷикистон мавриди баррасӣ қарор гирад».

Сарвари давлати тоҷикон таъкид намуданд, ки мавзуи ҳифзи пиряхҳо аз мавзуъҳои доимӣ ва меҳварии саммитҳои ҷаҳонӣ ва ҷаласаҳои байналмилалӣ бояд бошад: «Инчунин зарур мешуморем, ки талошҳои муштарак, аз ҷумла ҷиҳати татбиқи ҳадафҳо дар чаҳорчӯби уҳдадориҳои иқлимӣ, ки ба пешгирӣ намудани гармшавии ҳарорати ҳаво равона шудаанд ба роҳ монда шаванд. Баргузор намудани Конфронси Созмони Милали Муттаҳид оид ба пиряхҳо дар соли 2025 дар шаҳри Душанбе заминаи муҳимеро барои татбиқи ҳадафҳои зарурӣ ҷиҳати ҳифзи пиряхҳо дар сатҳи байналмилалӣ фароҳам месозад».

Хотиррасон мешавем, ки чорабинии канориии Амалҳои ҷаҳонӣ дар самти ҳифзи пиряхҳо дар доираи қатъномаи Созмони Милали Муттаҳид оид ба эълон намудани соли 2025 ҳамчун Соли байналмилалии ҳифзи пиряхҳо баргузор гардид.

Қабл аз ин ҷаласаи нахустин оид ба қатъномаи Созмони Милали Муттаҳид  дар шаҳри Ню-Йорк дар ҳошияи Конфронси оби СММ зери унвони «Харитаи роҳ барои соли 2025: Соли байналмилалии ҳифзи пиряхҳо» баргузор шуда буд.

АКС: АМИТ «Ховар»

Декабрь 4, 2023 11:25

Хабарҳои дигари ин бахш

«TASHKENT GRAND SLAM». Варзишгари Тоҷикистон Эмомалӣ Нуралӣ медали тилло ба даст овард
«ОИЛАИ НАМУНАВӢ». Таҳти ин унвон дар Тоҷикистон озмуни ҷумҳуриявӣ баргузор мегардад
Дар Душанбе масъалаи ҷалби сармояи ширкатҳои Қазоқистон ба иқтисоди Тоҷикистон баррасӣ шуд
«TASHKENT GRAND SLAM». Ҷудочии тоҷик Эмомалӣ Нуралӣ ба даври финалӣ баромад
Дар моҳи март сокинони Тоҷикистонро чӣ гуна ҳаво интизор аст?
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Ҳангоми истифодаи хабару маводи сомона истинод ба www.khovar.tj ҳатмӣ аст!
Дурнамои густариши ҳамкории Тоҷикистон ва Корпоратсияи байналмилалии молиявӣ баррасӣ гардид
Дар Анталия раванди густариши муносибатҳои дуҷонибаи Тоҷикистон ва Туркия мавриди баррасӣ қарор гирифт
Имрӯз даври якуми бақайдгирии довталабон барои иштирок дар имтиҳонҳои марказонидаи дохилшавӣ оғоз шуд
Президенти Ҷумҳурии Тоҷикистон Эмомалӣ Раҳмон ба якчанд қонун имзо гузоштанд
«ТОҶИКОНА МЕПӮШЕМ!». Аввалин шинохти таъриху фарҳанги ҳар миллат аз либоси миллӣ ибтидо мегирад