Юрий Сёмин: «Ҳидоятҳои Президенти Тоҷикистон Эмомалӣ Раҳмон дар лаҳзаи муҳим бозингаронро руҳбаланд намуд, ба онҳо неруву талоши бештар бахшид»
ДУШАНБЕ, 29.01.2024 /АМИТ «Ховар»/. Тавре АМИТ «Ховар» иттилоъ дод, ба даври ҳаштякниҳоӣ ва акнун ба даври навбатии чорякниҳоӣ роҳ ёфтани дастаи мунтахаби футболи Тоҷикистон сабаби таваҷҷуҳи ҷиддии коршиносони касбӣ, мутахассисони соҳа, журналистони расонаҳои варзишии минтақаву ҷаҳон, мураббиёни сатҳи гуногун нисбат ба футболи тоҷик ва бозигарони он гардид.
Собиқ мураббии дастаи мунтахаби футболи Русия, сармураббии дастаҳои футболи «Помир»-и Душанбе ва «Локомотив»-и шаҳри Москва Юрий Сёмин дар робита ба бозии дастаи мунтахаби Тоҷикистон оид ба футбол дар Ҷоми Осиё-2023 андешаҳои худро ба нашрияи «Фарғона» изҳор намуда, таъкид доштааст, ки «бозиҳои нахустини дастаи мунтахаби Тоҷикистон дар Ҷоми Осиё муваффақияти бузург аст. Дар гурӯҳ аз дастаи мунтахаби Чин болотар ҷой гирифтан кори саҳл нест. Дар айни замон дастаи мунтахаби Тоҷикистон вазифаи аввалини худ — нишон додани бозии сазоворро аллакай иҷро намуд. Бозингарон бо муҳити паҳновари мусобиқоти бузурги минтақавӣ шинос шуданд, онро аз худ намуданд ва таҷрибаи хуб гирифтанд».
Мураббии хизматнишондодаи Тоҷикистон Юрий Сёмин дар идомаи мусоҳиба бо сомонаи «Фарғона» гуфт, ки новобаста аз он ки дастаи футболи Тоҷикистон дар ин мусобиқа кадом ҷойро сазовор мегардад, бисёр мехостам, ки ин муваффақият охирин набошад: «Бояд ба рушди футболи кӯдакону наврасон ва ҷавонон таваҷҷуҳи беш аз пеш дода шавад».
Юрий Сёмин бо баҳогузорӣ ба фаъолияти сармураббии дастаи мунтахаби футболи Тоҷикстон Петр Сегрт чунин гуфтааст: «Вазифаи мураббии дастаи мунтахаб ҷамъ овардани беҳтаринҳо дар даста мебошад. Ӯ бояд таконбахш ва равоншинос бошад. Бояд гуфт, ки Сегрт бо бозингарон хеле хуб кор бурд. Дар ҳар бозӣ метавон дид, ки чӣ тавр бозингарон бо тамоми нерӯ ва ҷидду ҷаҳди бепоён бозӣ менамоянд. Дар баробари ҳамин хизмати мураббиҳои дастаҳои футболи мамлакат низ кам нест. Аз ҷумла фаъолияти Игор Черевченко, ки сармураббии дастаи «Истиқлол» буд».
Юрий Сёмин таъкид намудааст, ки омили дигаре, ки ба бозингарон таъсири нек медиҳад, ин дастгирии Ҳукумати мамлакат ва шахсан Президенти Ҷумҳурии Тоҷикистон муҳтарам Эмомалӣ Раҳмон мебошад.
«Ҳидоятҳои Президенти Тоҷикистон Эмомалӣ Раҳмон дар лаҳзаи муҳим — қабл аз бозӣ бо дастаи Лубнон бозингаронро руҳбаланд намуд, ба онҳо неруву талоши бештар бахшид. Ин низ кори кам нест», — гуфтааст Сёмин.
Хотирнишон месозем, ки дар бозии ҳаштякниҳоии Ҷоми Осиё-2023 оид ба футбол дастаи мунтахаби Тоҷикистон тими Амороти Муттаҳидаи Арабиро мағлуб намуда, ба даври чорякниҳоӣ баромад. Дар вақти асосӣ бозӣ бо ҳисоби 1:1 хотима ёфт. Дар 30 дақиқаи вақти изофӣ ҳисоб тағйир наёфт. Дар задани силсилаи зарбаҳои 11-метра бозингарони тоҷик маҳорати баланд нишон дода, бо ҳисоби 5:3 ғолиб омаданд.
Баромадани дастаи мунтахаби футболи Тоҷикистон аз марҳалаи гурӯҳӣ ба марҳалаи чорякниҳоӣ дастоварди бузурги футболи тоҷик дар замони истиқлоли давлатӣ мебошад.
Мураббии хизматнишондодаи Тоҷикистон, собиқ сармураббии дастаи овозадори «Помир»-и Душанбе Юрий Сёмин дар доираҳои варзишгарони Тоҷикистон ва байни мухлисони футболи тоҷик обрӯву эътибори хосса дорад.
АКС: АМИТ «Ховар»








Рақибони дастаи мунтахаби Тоҷикистон оид ба футзал дар Бозиҳои ҳамбастагии исломӣ-2025 муайян гардиданд
Имрӯз «Регар-ТадАЗ» аввалин бозиро дар марҳилаи гурӯҳии Лигаи даъвати КФО-2025/26 баргузор мекунад
Дастаи мунтахаби наврасони Тоҷикистон (U-17) оид ба футбол дар бозии санҷишӣ бо Каледонияи Нав ҳисобро мусовӣ кард
«Регар-ТадАЗ» барои иштирок дар марҳилаи гурӯҳии Лигаи даъвати КФО-2025/26 ба Бишкек сафар кард
Дар шаҳри Хуҷанд Чемпионати Тоҷикистон оид ба бокс ҷамъбаст гардид
Довталабони иҷозатномаи «PRO» оид ба футбол таҷрибаомӯзиро дар дастаи миллии Тоҷикистон анҷом доданд
Дастаи мунтахаби наврасони Тоҷикистон (U-17) дар Амороти Муттаҳидаи Араб бозиҳои дӯстона анҷом медиҳад
«МегаФон Тоҷикистон» шарики кулли Ҷоми Тоҷикистон оид ба футзал гардид
Замони баргузории бозиҳои даври 19-уми Чемпионати Тоҷикистон байни дастаҳои Лигаи олӣ муайян шуд
ҶОМИ ОСИЁ-2027. Дастаи мунтахаби Тоҷикистон тими Малдивро мағлуб намуд
ҶОМИ ОСИЁ-2027. Имрӯз дастаи мунтахаби Тоҷикистон дар марҳилаи интихобӣ бо тими Малдив бозӣ мекунад
ҶОМИ ОСИЁ-2027. Дастаи мунтахаби Тоҷикистон барои баргузории бозӣ бо Малдив ба шаҳри Мале рафт






