Аз фурудгоҳҳои байналмилалии Тоҷикистон як ширкати ҳавопаймоии ватанӣ ва 11 ширкати хориҷӣ парвози мунтазам анҷом додаанд

ДУШАНБЕ, 01.02.2024 /АМИТ «Ховар»/. Соли 2023 аз фурудгоҳҳои байналмилалии Тоҷикистон ба давлатҳои хориҷи дуру наздик як ширкати ҳавопаймоии ватанӣ –«Сомон Эйр» ва 11 ширкати ҳавопаймоии хориҷӣ, ба мисли «Ют Эйр», «Уралские авиалинии», «Северный ветер», «Сибирь-S7», «Ямал» -и Русия, «Эйр Астана»-и Қазоқистон, «Узбекистон ҳаво Йуларӣ»-и Узбекистон, «Флай Дубай»-и Амороти Муттаҳидаи Арабӣ, «Туркиш Эйрланс»-и Туркия, «Вориш Эйрланс»-и Эрон, «Ҷазира Эйрвейз»-и Кувайт ва «Бута Эйрвейз»-и Озарбойҷон парвозҳои мунтазам иҷро намуданд.

Дар ин хусус 31 январ Директори Агентии авиатсияи граждании назди Ҳукумати Ҷумҳурии Тоҷикистон Дилшод Сафарзода дар нишасти матбуотӣ ба хабарнигорони ватанию хориҷӣ иттилоъ дод.

Мавсуф гуфт, ки соли гузашта ба фурудгоҳҳои байналмилалии Тоҷикистон 12 ҳазору 238 парвоз аз ҷониби ширкатҳои ҳавопаймоии ватанию хориҷӣ анҷом дода шуд, ки тавассути ин хатсайрҳо беш аз 3,6 миллион мусофир интиқол дода шуданд. Ҳиссаи фурудгоҳҳои байналмилалии Тоҷикистон дар интиқоли мусофирон чунин аст: «Фурудгоҳи байналмилалии Душанбе»- беш аз 2,2 миллион, «Фурудгоҳи байналмилалии Хуҷанд»- зиёда аз 1,2 миллион, «Фурудгоҳи байналмилалии Кӯлоб» -қариб 300 ҳазор, «Фурудгоҳи байналмилалии Бохтар»- зиёда аз 130 ҳазор мусофир.

Марзия САИДЗОДА,
АМИТ «Ховар»

АКС: АМИТ «Ховар»