«САҲМИ ЗАНОН ДАР РУШДИ ИЛМИ МУОСИР». Дар Душанбе конференсияи даҳуми илмӣ-ҷумҳуриявӣ доир шуд

Февраль 21, 2024 16:07

ДУШАНБЕ, 21.02.2024 /АМИТ «Ховар»/. Сол ба сол теъдоди занону духтарони олим ва ихтироъкор афзуда, дар соҳаи маориф ва илми Ҷумҳурии Тоҷикистон 993 номзади илм, 131 доктори илм, 84 профессор аз ҳисоби занон, 608 дотсент, 204 нафари дорои унвони илмӣ ва 1 ҳазору 034 ассистент фаъолияти омӯзгорӣ ва илмӣ пеш мебаранд. Дар Академияи миллии илмҳои Тоҷикистон 2 академик, 3 узви вобастаи Академия, 33 доктори илм, 109 номзади илм, 294 магистрант, 104 доктори PHD аз ҳисоби занону духтарон мебошанд, ки дар таҳқиқ ва пажуҳишу илми муосир саҳми назаррас мегузоранд. Ин нукта зимни баргузории конференсияи даҳуми илмӣ-ҷумҳуриявӣ иброз гардид, хабар медиҳад АМИТ «Ховар».

21 феврал бахшида ба Рӯзи байналмилалии занону духтарон дар илм Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо Академияи миллии илмҳои Тоҷикистон таҳти унвони «Саҳми занон дар рушди илми муосир» конференсияи илмӣ-ҷумҳуриявӣ баргузор намуд.

Конференсияи илмӣ ҳамзамон дар ҳошияи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф барои солҳои 2020-2040» доир шуда, дар кори он муовини Сарвазири Ҷумҳурии Тоҷикистон, узви вобастаи Академияи миллии илмҳои Тоҷикистон Дилрабо Мансурӣ, Вазири фарҳанги Ҷумҳурии Тоҷикистон Матлубахон Сатториён, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода, Президенти Академияи миллии илмҳои Тоҷикистон Қобилҷон Хушвақтзода, Раиси Кумита Маҷлиси намояндагон оид ба илм, маориф, фарҳанг ва сиёсати ҷавонон Насиба Содиқӣ, муовини Раиси Ҳизби Халқии Демократии Тоҷикистон, номзади илмҳои сиёсӣ Хайринисо Юсуфӣ ва олимону донишмандзанони тамоми вазорату идораҳои мамлакат иштирок намуданд.

Зимни суханронӣ оид ба сиёсати илмпарваронаи давлату ҳукумат, хосса Президенти Ҷумҳурии Тоҷикистон муҳтарам Эмомалӣ Раҳмон ва нақши меҳварии занону духтарони олим ва ихтироъкор дар пешрафти илми муосири тоҷик, инчунин дастовардҳои илмии занон дар риштаҳои мухталифи илмӣ ибрози назар гардид.

Тазаккур дода шуд, ки олимон ва ихтироъкорзанони тоҷик ҳамчун қишри варзидаи зиёиён насли наврасу ҷавони мамлакатро ба он даъват менамоянд, ки ташаббуси фарогирии илму донишро дастгирӣ намуда, пайваста дар густариш додани истифодаи технологияҳои муосир дар тамоми соҳаҳои иқтисоди миллӣ, тақвият бахшидани тафаккури техникии аҳолӣ ва дар навбати аввал, фароҳам овардани фазои мусоид барои пешрафти илмҳои бунёдӣ, техникиву технологӣ ва тавсеаи ҷаҳонбинии илмии ҷомеа саҳм гузоранд.

Конференсия дар се бахш: ҷаласаи пленарӣ, бахши илмҳои ҷомеашиносӣ ва бахши илмҳои дақиқ ва табиатшиносӣ доир шуда, дар он дастоварду муваффақият ва пажуҳишу ихтирооти илмии олимзанҳои тоҷик муаррифӣ гардид.

Бешак, баргузории чунин ҳамоишҳои илмӣ барои пажуҳишгарони ҷавон, аспирантону магистрон заминаҳои нави илмӣ муҳайё намуда, шумораи зиёди ҷавондухтаронро ба анҷом додани корҳои илмӣ ҳидоят менамояд.

Дар 6 соли охир шумораи ихтироъкорон аз ҳисоби занон ба 283 нафар расида, соли 2023 аз 73 зани ихтироъкор 5 нафар бо ихтирооти нодир дар сатҳи байналмилалӣ бо Шоҳҷоиза ва медали тилло, 10 нафар бо медали нуқрагӣ ва 1 нафар бо медали биринҷӣ сарфароз гардиданд.

Таҳлили ҳамасолаи мақолаҳои илмӣ нишон медиҳад, ки олимон ва занони ихтироъкори тоҷик бо истифода аз техникаву технология ва воситаву абзори пешқадами таҳқиқоти илмӣ пайваста барои такмил додани сатҳу савияи дониш ва пажуҳиши илмӣ кӯшиш намуда, тамоми неруро ба афзудани обрӯву эътибори илми тоҷик, фарҳанг ва маънавиёт, таблиғи ҷаҳонбинии илмӣ, мубориза бо таассубу хурофот ва ифротгароиву мафкураи иртиҷоӣ равона менамоянд.

Дар анҷоми кори конференсияи илмӣ бо назардошти саҳми назаррас ва арзандаи олимону ихтироъкорзанон дар рушди илми муосир ва муаррифии дастовардҳои илми тоҷик дар сатҳи байналмилалӣ як зумра занону духтарон бо Ифтихорномаи Кумитаи кор бо занон ва оилаи назди Ҳукумати Ҷумҳурии Тоҷикистон сарфароз гардиданд.

Ин иқдом ба баланд бардоштани руҳияи олимони ҷавон мусоидат намуда, дар оянда низ баҳри ҳавасмандкунии ин қишри фаъоли ҷомеа ҳамоишҳои зиёди илмӣ доир мегарданд.

Бояд гуфт, ки сарпарастии конференсияи илмиро Хадамоти бехатарии радиатсионӣ ва ядроии Академияи миллии илмҳои Тоҷикистон ба уҳда гирифта, дар он намояндагони вазорату идораҳо, занони олиму ихтироъкор, аспирантону магистрон, устодону донишҷӯёни муассисаҳои таҳсилоти олӣ ва миёнаи касбии мамлакат иштирок намуданд.

София ШОИК,
АМИТ «Ховар»

АКС: АМИТ «Ховар»

Февраль 21, 2024 16:07

Хабарҳои дигари ин бахш

«Душанбе пешрафта ва сарсабз мешавад», -бардошт аз ҳамоиш дар Маркази тадқиқоти стратегӣ
МАСЛИҲАТИ МУТАХАССИС. Истифодаи барги тару тозаи қоқу кори узвҳои ҳозимаро тақвият мебахшад
Ҳамкории Ваколатдор оид ба ҳуқуқи инсон дар Тоҷикистон бо мақомоти давлатии Финляндия густариш меёбад
ИМРӮЗ- РӮЗИ КОРМАНДОНИ МАҚОМОТИ АДЛИЯ. Онҳо дар сафи пеши ҳифзи ҳуқуқу озодиҳои асосии инсон, ҳимояи қонуният ва адолат қарор доранд
Озмоишгоҳи миллии референсӣ дар бахши озмоиши бактериологӣ соҳиби Сертификат ва баҳогузории 100-фоиза гардид
«БАРОБАРИИ ГЕНДЕРӢ– ҲАДАФИ РУШДИ УСТУВОР». Дар Душанбе вохӯрии занони Тоҷикистон ва Узбекистон баргузор шуд
АМИТ «Ховар»: Намоишгоҳи маҳсулоти саноатии Ҷумҳурии Узбекистон дар Маркази ЭКСПО-и шаҳри Душанбе 3 рӯз идома меёбад
Кумаки башардӯстонаи Тоҷикистон ба мардуми аз обхезиҳои шадид зарадидаи Қазоқистон ба роҳ баромад
Намояндагони Тоҷикистон дар Форуми ташкилоти кор бо ҷавонони аъзои ИДМ дар шаҳри Тошканд иштирок намуданд
Кумитаи кор бо ҷавонон ва варзиши Тоҷикистон бо ташкилоти байналмилалии соҳавӣ ҳамкориро тақвият мебахшад
Имрӯз дар Душанбе бо иштироки меҳмонон аз Узбекистон Озмуни ҷумҳуриявии «Кадбонуи беҳтарин» ҷамъбаст гардид
Ҳайати намояндагӣ-занони роҳбари воҳидҳои сохтории Ҷумҳурии Узбекистон ба Тоҷикистон омад