Дар деҳоти Фирӯзобаи Конибодом иди Наврӯзро бо риояи анъанаҳои миллӣ ҷашн гирифтанд

СУҒД, 25.03.2024 /АМИТ «Ховар»/. Сокинони деҳоти Фирӯзобаи шаҳри Конибодом тантанаҳои наврӯзиро бо риояи анъанаҳои миллӣ ҷашн гирифтанд, хабар медиҳад АМИТ «Ховар» Хадамоти матбуоти Раиси  вилояти Суғд.

Раиси вилояти Суғд дар чорабинии наврӯзии деҳоти Фирӯзоба иштирок намуда, аз номи Пешвои миллат муҳтарам Эмомалӣ Раҳмон фарорасии Наврӯзи хуҷастапайро табрик намуд.

Иброз гардид, ки Наврӯз яке аз куҳантарин ҷашни миллӣ дар ҷаҳон ба ҳисоб рафта, зиёда аз шаш ҳазор сол пеш вобаста ба оғози кори деҳқонӣ пайдо шуда, минбаъд такмил ёфтааст. Дар ин рӯз шабу рӯз баробар гардида, табиат бедор мешавад ва гузаштагони мо онро такмили дунёи нав медонистанд.

Наврӯз ҳар сол ба сарзамини тоҷикон орзуҳои нав меорад. Ин ҷашни қадимаи миллӣ дар замони соҳибистиқлолии Тоҷикистон бо мазмуни тоза боз ҳам ғанитар гардидааст. Ин далели он аст, ки давлату Ҳукумати мо ба фарҳангу таърихи пурғановати миллати куҳанбунёдамон арҷ гузошта, барои пойдории истиқлолу озодӣ ва сарҷамъию муттаҳидӣ кӯшиш ба харҷ медиҳанд.

Изҳори боварӣ шуд, ки сокинони шаҳри Конибодом аҳлона меҳнат намуда, ҷашни таърихии 35-солагии Истиқлоли давлатии Ҷумҳурии Тоҷикистонро бо дастовардҳои назаррас истиқбол мегиранд.

Раиси вилоят растаҳои наврӯзиро, ки дар он маҳсули дасти ҳунармандон, таомҳои миллии хоси Наврӯз ва дигар маҳсулот гузошта шуда буд, тамошо намуда, ба кӯдакону хурдсолон ва маъюбон туҳфаҳои идона супорид.

АКС: Хадамоти матбуоти Раиси  вилояти Суғд