Дар Душанбе масъалаи омодагӣ ба Форуми сармоягузории Тоҷикистон ва Узбекистон баррасӣ шуд

ДУШАНБЕ, 11.03.2024 /АМИТ «Ховар»/. Ба ҳолати 1 январи соли 2024 дар Тоҷикистон 90 корхона бо ҳиссаи соҳибкорони Узбекистон сабти ном шуда, дар давраи солҳои 2007-2023 аз ҷониби онҳо ба иқтисодиёти Тоҷикистон 74,1 миллион доллар сармоя ворид гардидааст.

АМИТ «Ховар» бо истинод ба  Кумитаи давлатии сармоягузорӣ ва идораи амволи давлатии Ҷумҳурии Тоҷикистон  иттилоъ медиҳад, ки ин нукта дар мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо вазири сармоягузорӣ, саноат ва савдои Ҷумҳурии Узбекистон Лазиз Қудратов дар Душанбе таъкид гардид.

Дар мулоқот вазъи кунунӣ ва дурнамои густариши ҳамкорӣ байни Тоҷикистон ва Узбекистон дар самти сармоягузорӣ, аз ҷумла лоиҳаҳои афзалиятноки мавриди баррасии ҷонибҳо қарордошта, ҷалби сармояи мустақим, баргузории Форуми сармоягузории Тоҷикистон ва Узбекистон ва фаъолияти ширкати сармоягузории Тоҷикистон ва Узбекистон муҳокима гардид.

Мусоҳибон барои тақвияти ҳамкории минбаъда дар самти маблағгузории лоиҳаҳои афзалиятнок тавассути ҷалби бахши хусусӣ ва ширкати сармоягузории Тоҷикистон ва Узбекистон, афзоиши ҳаҷми сармояи мустақим, инчунин баргузор намудани Форуми сармоягузории Тоҷикистон ва Узбекистон дар доираи сафари давлатии Президенти Ҷумҳурии Узбекистон ба Ҷумҳурии Тоҷикистон дар шашмоҳаи якуми соли равон изҳори омодагӣ намуданд.

АКС: АМИТ «Ховар»