ҶОМИ ҶАҲОН-2026. Дастаи мунтахаби Тоҷикистон оид ба футбол дар шаҳри Риёз нахустин тамринҳоро анҷом дод

ДУШАНБЕ, 20.03.2024 /АМИТ «Ховар»/. Дастаи мунтахаби Тоҷикистон оид ба футбол дар доираи омодагӣ ба бозии интихобии Ҷоми ҷаҳон-2026 ба муқобили яккачини Арабистони Саудӣ нахустин тамринҳояшро дар Риёз анҷом дод. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Машқҳои дастаи мо дар варзишгоҳи Шоҳзода Файсал бин Фаҳд якуним соат давом намуданд. Ҳимоятгари «Персеполис»-и Эрон Ваҳдат Ҳанонов ба даста пайваст. Дастаи Тоҷикистон баъди ба саф пайвастани нимҳимоятгари «Тюмен»-и Русия Руслан Хайлоев комил мешавад.

Бояд гуфт, ки бозии интихобии Ҷоми ҷаҳон-2026 байни дастаҳои мунтахаби Арабистони Саудӣ ва Тоҷикистон 21 март дар варзишгоҳи Донишгоҳи Шоҳ Сауд баргузор шуда, соати 23:59 ба вақти Душанбе оғоз мешавад.

АКС: Федератсияи футболи Тоҷикистон