Шаҳрвандони Русия, ки дар Тоҷикистон қарор доранд, метавонанд дар интихоботи президенти Русия овоз диҳанд

ДУШАНБЕ, 11.03.2024 /АМИТ «Ховар»/. 17 март интихоботи Президенти Федератсияи Русия баргузор мешавад, хабар медиҳад мухбири АМИТ «Ховар».

Тавре Сафорати Русия дар Тоҷикистон иттилоъ медиҳад, дар интихоботи қарибулвуқуи Президенти Федератсияи Русия шаҳрвандони Русия, ки дар Тоҷикистон қарор доранд, метавонанд дар Душанбе ва Хуҷанд овоз  диҳанд.

  “Қитъаҳои интихоботӣ 17 март аз соати 08:00 то 20:00 фаъолият менамоянд. Қитъаи интихоботӣ дар бинои Раёсати консулии Сафорат дар Душанбе дар суроғаи: кӯчаи Абуалӣ ибни Сино, бинои 29/31 ҷойгир мешавад. Қитъаи интихоботӣ дар ҳудуди Консулгарии генералии Русия дар Хуҷанд дар кӯчаи Сирдарё, бинои 21 ҷойгир аст. Илова бар ин, барои хизматчиёни ҳарбии Русия ва аъзои оилаи онҳо 4 қитъаи иловагии интихоботӣ кушода мешавад»,-иттилоъ медиҳад манбаъ.

Ҳамаи шаҳрвандони Русия, ки дар қаламрави Ҷумҳурии Тоҷикистон қарор доранд ва дар рӯзи интихобот ба синни 18 расидаанд, метавонанд ба яке аз қитъаҳои интихоботӣ шахсан ҳозир шуда, шиносномаи дорои эътибор дар Русия (хориҷӣ, дипломатӣ, хизматӣ, дохилӣ)-ро пешниҳод намоянд.

Бояд гуфт, ки 8 феврал Комиссияи марказии интихоботи Русия рӯйхати ниҳоии номзадҳоро барои президентӣ дар соли 2024 тасдиқ намуд:

1. Даванков Владислав Андреевич, ҳизби «Одамони нав».
2. Владимир Владимирович Путин, худпешбарӣ.
3. Слутский Леонид Эдуардович, ҲЛДР.
4. Харитонов Николай Михайлович, ҲКФР.

АКС аз манбаъҳои боз