«ЗИНДАГӢ АЗ МОДАР САРЧАШМА МЕГИРАД». Дар Душанбе бахшида ба Рӯзи Модар барномаи тантанавии фарҳангӣ баргузор гардид

Март 6, 2024 16:55

ДУШАНБЕ, 06.03.2024 /АМИТ «Ховар»/. Бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон бахшида ба бузургдошти Рӯзи Модар бо иштироки ходимони давлатӣ, фаъолони арсаи сиёсат ва ҷомеа, намояндагони вазорату идора ва ташкилоту муассисаҳо таҳти унвони «Зиндагӣ аз модар сарчашма мегирад» барномаи тантанавии фарҳангӣ доир гардид. Дар ин хусус АМИТ «Ховар» хабар медиҳад.

Барномаи тантанавӣ бо суханони табрикии муовини Сарвазири Ҷумҳурии Тоҷикистон Дилрабо Мансурӣ ва Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода оғоз гардид. Муовини Сарвазири Тоҷикистон аз номи Ҳукумати ҶумҳурииТочикистон кулли модарон ва занону духтаронро бо фарорасии Рӯзи Модар табрик намуд.

Гуфта шуд, ки бузургдошти Рӯзи Модар, ки 15 сол муқаддам бо ибтикори Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардида буд, ба кулли модарону занони тоҷик руҳу илҳоми тоза бахшид. Ин нишони сиёсати хирадмандонаву оқилонаи Президенти Ҷумҳурии Тоҷикистон муҳтарам Эмомалӣ Раҳмон дар мавриди таваҷҷуҳу дастгириҳои пайвастаи занону модарони тоҷик мебошад.

Ин ибтикору иқдоми наҷиби Пешвои миллат арҷгузорӣ ба шабзиндадориҳои модарон буд, ки давоми ҳазорсолаҳо фарзандони баруманди миллатро дар оғӯши гарму нарми хеш аз газандҳо нигоҳ дошта, бо аллаҳои гӯшнавозу ҷонбахш ба камол расонидаанд. Меҳру муҳаббат ва арҷгузорӣ ба модар буд, ки мақому манзалати зан-модар бо кӯшишу заҳматҳои Сарвари давлат дар сатҳи сиёсати давлатӣ пуштибонию дастгирӣ пайдо намуд.

Дар сатҳи давлатӣ ҷашн гирифтани Рӯзи Модар нишонаи эътибору эҳтироми зиёди давлату Ҳукумати мамлакат нисбат ба модарону занон ва дар даврони соҳибистиқлолии мамлакат манзалати хоссаро соҳиб гаштани онҳо буда, заҳмату фидокориҳои занон-модарон ҳамеша қадр мегардад. Зеро занону модарони тоҷик ҳанӯз дар оғози даврони истиқлоли давлатӣ ба хотири ҳифзи ҳуқуқу озодиҳояшон ва ба эътидол овардани вазъи мамлакат азму талош карда, дар роҳи расидан ба сулҳу субот ва ваҳдати миллӣ бо нангу номуси ватандорӣ ва заҳмати софдилона дар пешрафти тамоми соҳаҳои ҳаёти ҷомеа саҳми арзишманд гузоштаанд.

Ҳоло ҳазорҳо нафар занону духтарони қавиирода ва ҷасуру далери мо дар сафи Кувваҳои Мусаллаҳ ва мақомоти ҳифзи ҳуқуқ рисолати ватандӯстиашонро адо намуда, дар ҳифзи марзу буми Ватан ва тартиботу оромии ҷомеа бо масъулияти баланд фаъолият менамоянд.

Ҳукумати мамлакат барои мунтазам беҳтар гардонидани вазъи иҷтимоии занон ва дастгирии ин табақаи бонуфузи ҷомеа ҳамаи тадбирҳои заруриро андешида, барои ҷалби бештари онҳо ба ҳаёти сиёсӣ ва ҷамъиятии ҷомеа чораҳои судманд мебинад.

Иброз гардид, ки имрӯз бо қаноатмандӣ метавон гуфт, ки дар натиҷаи дастгириву ғамхориҳои пайвастаи Пешвои миллат муҳтарам Эмомалӣ Раҳмон занону духтарони лаёқатманд ва кордону ташаббускор ба хизмати давлатӣ ва идоракунии давлатӣ торафт бештар ҷалб гардида, зиёда аз 25 фоиз хизматчиёни давлатии амалкунанда вазифаҳои пурмасъули роҳбарикунандаро сарбаландона адо менамоянд.

Занони соҳибмаърифат ва бонангу номуси тоҷик бо шукронаи озодиву соҳибихтиёрии давлат ва фазои орому осудаи мамлакат, бо қалби ҳассоси худ набзи ҷомеаи имрӯзаро хуб дарк намуда, бо истифода аз рисолати пурмасъул барои таҳкими сулҳу ва ватандӯсту субот, тарбияи фарзандони худогоҳу хештаншинос ватанпараст, риояи муқаррароти қонунҳои миллӣ «Дар бораи танзими анъана ва ҷашну маросим дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд» барои беҳтар гардидани некуаҳволӣ ва шароити зиндагии хонаводаҳояшон саҳми модаронаашонро мегузоранд.

Ба ҳамоиши идона барномаи рангини фарҳангии ҳунармандони шинохтаи ҷумҳурӣ шаҳомати хосса бахшида, ба иштирокдорон накҳату нафосати тоза эҳдо намуд.