Дар Истаравшан гурӯҳи нахустини ҷавонон ба сафи Қувваҳои Мусаллаҳ пайваст

Апрель 4, 2024 17:18

СУҒД, 04.04.2024 /АМИТ «Ховар»/. Дар майдони Нишони давлатии шаҳри Истаравшан ба муносибати гусели нахустин гурӯҳи ҷавонон ба хизмати ҳарбӣ дар сафи Қувваҳои Мусаллаҳи ҷумҳурӣ бо иштироки масъулини мақомоти давлатӣ, фаъолон, даъватшавандагон ва волидони онҳо чорабинии бошукуҳ баргузор гардид, хабар доданд ба АМИТ «Ховар» дар дафтари матбуоти Раиси шаҳри Истаравшан.

Дар ин рӯзҳои фараҳбахш ҷавонони шаҳри Истаравшан ихтиёран ба комиссариати ҳарбии шаҳр омада, иброз доштанд, ки мехоҳанд қарзи шаҳрвандияшонро дар назди давлату миллат иҷро намоянд.

Раиси шаҳри Истаравшан Адҳам Маъмурзода изҳор намуд, ки бо дастгирии Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон шароити хизмати ҳарбӣ дар ҷумҳурӣ рӯз то рӯз беҳтар гардида, барои сарбозон тамоми шароити мусоид фароҳам оварда шудааст.

Имрӯз дар шароити сулҳу субот ва оромиву осмони мусаффои Тоҷикистон ҷавонон бо пайравӣ ба падарону бобоёни шуҳратёрашон, бо амри дил ва ҳисси ватандӯстона ихтиёран барои ба сафҳои Артиши миллӣ ҷалб гардидан омода мебошанд. Зеро маҳз тавассути хизмат дар қисмҳои ҳарбӣ ҷавонон обутоб ёфта, ҳамчун мардони шуҷои Ватан ба камол мерасанд.

Дар ҳамоиш раисони ҷамоатҳои деҳоти Сабристон, Ҷавкандак, Қалъаи Баланд ва кумитаи маҳаллаҳои «Курушкада», «Имоми Аъзам», «Дилшоди Барно», ки дар нахустин рӯз нақшаи даъвати ҳарбиро пеш аз муҳлат иҷро намуданд, бо Сипоснома ва туҳфаи хотиравии мақомоти иҷроияи ҳокимияти давлатии шаҳр қадрдонӣ шуданд.

Дар фарҷом аз ҷониби модарон анъанаи нонгазон баргузор гардида, баҳри болидахотирии ҳозирин аз ҷониби бахши фарҳанги шаҳр барномаи рангини фарҳангиву фароғатӣ пешкаш гардид.

АКС: дафтари матбуоти Раиси шаҳри Истаравшан

Апрель 4, 2024 17:18

Хабарҳои дигари ин бахш

Дар Душанбе Маркази тамоси электронӣ оид ба қабули муроҷиатҳо ташкил карда шуд
АМАЛИЁТИ «БАЧАҲО». Бо мақсади пешгирии ҳодисаҳои роҳу нақлиёт бо иштироки кӯдакону наврасон гузаронида мешавад
Сатҳи забондонии кормандони милитсияи Хатлон санҷида мешавад
Дар шаш моҳ дар Тоҷикистон 495 ҳолати машғул шудан ба ҷодугарӣ ва фолбинӣ ошкор карда шуд
«МАДАНИЯТИ ШАҲРДОРӢ». Дар Хатлон бо мақсади таҳким бахшидани ҳамкорӣ бо аҳолӣ амалиёт гузаронида шуд
Дар Душанбе татбиқи марҳилаи дуюми лоиҳаи «Шаҳри бехатар» баррасӣ гардид
Дар Хатлон масъалаҳои ҳифзи тартиботи ҷамъиятӣ баррасӣ карда шуданд
Дар Вазорати мудофиаи Тоҷикистон тарҳрезии либоси хизматчиёни ҳарбӣ дар шакли ягонаи миллӣ баррасӣ гардид
Сатҳи забондонии кормандони Вазорати корҳои дохилӣ санҷида мешавад
ДАСТОВАРДИ ДАВРОНИ СОҲИБИСТИҚЛОЛӢ. Ба таъсиси Кумитаи ҳолатҳои фавқулода ва мудофиаи граждании Тоҷикистон 31 сол пур шуд
Ҳамкорӣ дар самти пешгирии ҷинояткорӣ байни милитсияи Душанбе ва Тошканд тақвият меёбад
Дар Хоруғ машқи омодабошии мудофиаи ҳудудӣ ва захираҳои сафарбарӣ баргузор шуд