Саҳми Бонки ҷаҳонӣ дар татбиқи ислоҳоти сохтории иқтисодиёти Тоҷикистон назаррас арзёбӣ гардид

ДУШАНБЕ, 19.04.2024 /АМИТ «Ховар»/. Масъалаҳои марбут ба вазъи иқтисодии мамлакат, аз ҷумла соҳаҳои энергетика, рақамикунонӣ, беҳтар намудани фазои сармоягузорӣ ва дигар самтҳои таъмини рушди иқтисодӣ дар мулоқоти ҳайати Ҷумҳурии Тоҷикистон бо ноиби Президенти Бонки ҷаҳонӣ оид ба кишварҳои Аврупо ва Осиёи Марказӣ хонум Антонелла Бассани, ки дар шаҳри Вашингтон доир гардид, баррасӣ шуданд.

Дар Бонки миллии Тоҷикистон  ба АМИТ «Ховар» иттилоъ доданд, ки роҳбари ҳайати Тоҷикистон, муовини якуми Сарвазири мамлакат Ҳоким Холиқзода дар мулоқот бо ноиби Президенти Бонки ҷаҳонӣ оид ба вазъи макроиқтисодии мамлакат дар соли 2023 маълумот дода, гуфт, ки Бонки ҷаҳонӣ ҳамчун яке аз шарикони асосии таъмини рушди устувори Тоҷикистон дар татбиқи ислоҳоти сохтории иқтисодиёти мамлакат саҳми назаррас дорад.

Дар мулоқот ҷонибҳо оид ба масоили сохтмони иншооти бузурги стратегӣ – «Неругоҳи барқи обии Роғун», маблағгузории Тоҷикистон барои соли 2024 дар ин лоиҳа ва ҷалби маблағгузории алоҳида тавассути лоиҳаҳои Бонки ҷаҳонӣ, инчунин барои зиёд кардани захираҳои молиявӣ ва беҳтар шудани сифати сандуқи қарзии Бонки ҷаҳонӣ дар Ҷумҳурии Тоҷикистон табодули андеша намуданд.

    АКС: Бонки миллии Тоҷикистон