35-СОЛАГИИ ИСТИҚЛОЛИ ДАВЛАТӢ. Дар ноҳияи Данғара як қатор иншооти таъйиноти гуногун ба истифода дода шуданд

ДУШАНБЕ, 25.05.2024 /АМИТ «Ховар»/. 24 май дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Данғара як қатор иншооти таъйиноти гуногун, аз ҷумла муассисаҳои тандурустӣ, таълимӣ корхонаҳои саноатӣ ва марказҳои хизматрасони ба истифода дода шуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон хабар медиҳад.

Аз ҷумла дар ноҳия Шуъбаи таваллуд ва бемориҳои дили Беморхонаи марказӣ, майдончаи варзишии универсалии назди Беморхона, бинои сардхона барои 100 тонна маҳсулоти кишоварзӣ, марҳилаи дуюми корхонаи истеҳсолии Ҷамъияти дорои масъулияташ маҳдуди «Сиёвуш – Ёқуб», Маркази саломатӣ ва бинои маъмурии Корхонаи воҳиди давлатии ҷумҳуриявии «Тоҷикагролизинг» ифтитоҳ гардиданд.

Дар расми ифтитоҳи ин иншоот намояндагони Ҳукумати Ҷумҳурии Тоҷикистон, роҳбарияти вазорату идораҳои дахлдор ва Мақомоти иҷроияи ҳокимияти давлатии вилояти Хатлон иштирок намуданд.

Иншооти мазкур дар доираи нақшаи чорабиниҳо бахшида ба истиқболи сазовори ҷашни 35-солагии Истиқлоли давлатӣ мавриди баҳрабардорӣ қарор гирифтанд.

АКС: Мақомоти иҷроияи ҳокимияти давлатии вилояти Хатлон