Ҳамкории байналмилалии Донишгоҳи технологии Тоҷикистон бо шарикон тақвият меёбад

ДУШАНБЕ, 04.05.2024. /АМИТ «Ховар»/. Дар Донишгоҳи технологии Тоҷикистон бо мақсади амалӣ намудани ҳамкории мутақобилан судманди байналмилалӣ бо роҳбари Хадамоти байналмилалии таҳсилотии Малайзия, доктор Абдул Разоқ Аҳмад, инчунин намояндагони Вазорати саноат ва технологияҳои нави Ҷумҳурии Тоҷикистон мулоқот доир шуд. Дар ин хусус АМИТ «Ховар» бо истинод ба Донишгоҳи технологии Тоҷикистон хабар медиҳад.

Зимни мулоқот дар доираи барномаву лоиҳаҳои инноватсионӣ меҳмонон бо сохтори донишгоҳ, дастовардҳои илмӣ-таълимӣ ва ҳамкории байналмилалӣ шинос гардиданд.

Дар ҷараёни муколама Абдул Разоқ Аҳмад пешниҳод намуд, ки дар Донишгоҳи технологии Тоҷикистон маркази муштарак таъсис дода шавад, ки ба он метавон 20-30 донишҷӯ ва омӯзгори Малайзияро ҷалб намуд. Марказ ҳамчун макони мубодилаи таҷриба байни омӯзгорони донишгоҳҳои бонуфузи Малайзия ва омӯзгорону кормандони Донишгоҳи технологии Тоҷикистон дар соҳаҳои калидӣ, аз қабили технологияҳои иттилоотии коммуникатсионӣ, робототехника ва зеҳни сунъӣ хизмат менамояд.

Инчунин пешниҳод карда шуд, ки лоиҳаҳои муштарак байни муассисаҳо бо таваҷҷуҳ ба рушди соҳаи зеҳни сунъӣ гузаронида шаванд.

Абдул Разоқ Аҳмад тазаккур дод, ки донишҷӯён ва мактаббачагони тоҷик дар соҳаи математика дониши хуб доранд, ки ин омили асосии ҳамкории муваффақ дар оянда мебошад.

Иброз гардид, ки ҳамкории Донишгоҳи технологии Тоҷикистон бо маркази Хадамоти байналмилалии таълимӣ ва донишгоҳҳои Малайзия барои ҳарду муассиса ва донишҷӯён аҳамияти хосса дорад. Бо кӯшиши муштарак метавон дар рушди маориф ва илм дар ҳарду давлат саҳми назаррас гузошт.

Дар Донишгоҳи технологии Тоҷикистон ҳамзамон мулоқоти ректори Донишгоҳи технологии Тоҷикистон бо  ректори Донишгоҳи технологияҳои иттилоотии Остонаи Ҷумҳурии Қазоқистон бобати ба роҳ мондани ҳамкории судманди байналмилалӣ доир шуд.

Зимни суҳбат масъалаҳои ҳамкории самараноки тарафайн, аз ҷумла мубодилаи академии донишҷӯён ва омӯзгорон, тайёр намудани мутахассисони соҳаи технологияҳои иттилоотӣ-коммуникатсионии ҷавобгӯи талаботи бозори меҳнат, иштирок дар форуму симпозиум ва конференсияҳои илмӣ, ба роҳ мондани таҳқиқоти муштараки илмӣ, ҷалби омӯзгорон ва мутахассисони якдигар, махсусан дар самти зеҳни сунъӣ, роботсозӣ ва технологияҳои иттилоотӣ-коммуникатсионӣ, истифодаи заминаҳои моддӣ-техникии якдигар дар раванди машғулияти касбӣ ва таҳияи лоиҳаҳои грантии байналмилалӣ баррасӣ гардид.

АКС: Донишгоҳи технологии Тоҷикистон