АЗ ИФТИТОҲИ ГУЗАРГОҲИ САРҲАДИИ «КУЛМА ҚАРОСӮ» 20 СОЛ СИПАРӢ ШУД. Нақши он дар тақвияти робитаҳои тиҷоратии Тоҷикистон ва Чин муассир аст

Май 25, 2024 08:39

ДУШАНБЕ, 25.05.2024 /АМИТ «Ховар»/. 25 майи соли 2024 аз ифтитоҳи гузаргоҳи сарҳадии «Кулма Қаросӯ», ки дар тақвияти ҳамкории иқтисодию тиҷоратии Тоҷикистон ва Чин нақши муҳим дорад, 20 сол сипарӣ мешавад. Дар иртибот ба 20- солагии ифтитоҳи гузаргоҳи сарҳадии «Кулма – Қаросӯ» дар ноҳияи Мурғоб бо иштироки роҳбарияти Вазорати нақлиёти Тоҷикистон, Вилояти Мухтори Кӯҳистони Бадахшон ва намояндагони Ноҳияи мухтори Синзян-Уйғури Ҷумҳурии Мардумии Чин маҷлиси тантанавӣ доир гардид. Дар ин хусус АМИТ «Ховар» бо истинод ба Вазорати нақлиёти ҷумҳурӣ иттилоъ медиҳад.

Раиси Вилояти Мухтори Кӯҳистони Бадахшон Алишер Мирзонабот иброз намуд, ки «Ҷумҳурии Мардумии Чин яке аз шарикони стратегии Ҷумҳурии Тоҷикистон буда, бо шарофати сиёсати дурандешонаи Сарони ду давлати ҳамсоя- Тоҷикистон муҳтарам Эмомалӣ Раҳмон ва Чин муҳтарам Си Ҷинпин ҳамкории мутақобилан судманд байни давлатҳо, робитаҳои тиҷоратию иқтисодӣ, муносибатҳои дӯстона ва анъанавии халқҳои ҳарду давлат пайваста густариш меёбанд».

Муовини волии Ноҳияи мухтори Синзян-Уйғури Ҷумҳурии Мардумии Чин Сун Хунмей таъкид намуд, ки гузаргоҳи «Кулма –Қаросу», ки 20 сол пеш, 25 майи соли 2004 дар марзи Ноҳияи мухтори Синзян-Уйғури Ҷумҳурии Мардумии Чин ва Вилояти Мухтори Кӯҳистони Бадахшони Ҷумҳурии Тоҷикистон таъсис дода шуд, имрӯз ҳамчун нуқтаи асосӣ барои воридоту содироти молу маҳсулот ва рушди робитаҳои тиҷоратӣ истифода бурда мешавад».

Ба андешаи муовини Вазири нақлиёти Ҷумҳурии Тоҷикистон, фаъолияти ин гузаргоҳ, ҳамлу нақли байналмилалии автомобилӣ байни давлатҳо дар доираи созишномаҳои байниҳукуматии ҷонибҳо «Оид ба ҳамлу нақли байналмилалии автомобилӣ» (аз соли 2008) ва «Дар бораи нуқтаҳои гузаргоҳ дар сарҳади давлатии Тоҷикистон ва Чин ва реҷаи кории онҳо» (аз соли 2011) дар сатҳи зарурӣ ба роҳ монда шудааст.

Гуфта шуд, ки ҳаҷми боркашонӣ тавассути гузаргоҳи «Кулма-Қаросӯ» сол аз сол афзоиш ёфта, соли 2023 ҳамлу нақли бор 472 ҳазору 852 тоннаро ташкил дод, ки нисбат ба соли 2022 (170 576 тонна) ба миқдори 302 276 тонна ё 2,5 баробар зиёд мебошад. Дар сурати таъмин намудани инфрасохтор ва шароити зарурӣ ҳаҷми боркашонӣ метавонад боз ҳам бештар гардад. Аз ин рӯ, бо мақсади боз ҳам самаранок истифода бурдани ин гузаргоҳ аз ҷониби Тоҷикистон лоиҳаи Протокол оид ба ворид намудани тағйиру иловаҳо ба Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин «Дар бораи нуқтаҳои гузаргоҳ дар сарҳади давлатии Тоҷикистону Чин ва реҷаи кории онҳо» таҳия ва пешниҳод гардид, ки фаъолияти шабонарӯзии гузаргоҳро бе рӯзҳои истироҳат, ид ва рӯзҳои таътил пешбинӣ менамояд.

Иштирокдорони маҷлиси идона намоишгоҳи ҳунарҳои мардумиро, ки дар маркази ноҳияи Мурғоб ташкил гардид, тамошо намуданд.

Дар фарҷоми маҷлиси тантанавӣ филми кӯтоҳметраж, ки аз фаъолияти гузаргоҳи сарҳадии «Кулма- Қаросӯ» нақл мекард ва барномаи ҳунарии санъаткорони ноҳияи Мурғоб пешкаши иштирокдорон гардид.

Иштирокдорони маҷлиси тантанавӣ ҳамзамон бо фаъолияти гузаргоҳи сарҳадии «Кулма–Қаросӯ», ки дар сарҳади Вилояти Мухтори Кӯҳистони Бадахшони Тоҷикистон ва Ноҳияи мухтори Синзян-Уйғури Чин, дар баландии 4362 метр аз сатҳи баҳр ва дар масофаи 80 километр аз маркази ноҳияи Мурғоб ҷойгир аст, шинос шуданд.

Марзия САИДЗОДА,
АМИТ «Ховар»

АКС: Вазорати нақлиёти Ҷумҳурии Тоҷикистон

Май 25, 2024 08:39

Хабарҳои дигари ин бахш

Ҳамкории Тоҷикистон ва Чин дар соҳаи обу энергетика густариш меёбад
Дар Душанбе густариши ҳамкории Тоҷикистон ва Институти ҷаҳонии рушди сабз баррасӣ гардид
Вазири энергетика ва захираҳои об: «Тоҷикистон ба барномаҳои омӯзишӣ ва такмили ихтисоси мутахассисони соҳаи об сармоягузорӣ менамояд»
Байни Тоҷикистон ва Беларус дар соҳаи ҳифзи муҳити зист Ёддошти тафоҳум ба имзо расид
Ҷумҳурии Тоҷикистон дар Озарбойҷон «Боғи дӯстии зардолу» бунёд менамояд
То соли 2032 неруи барқ дар Тоҷикистон пурра аз ҳисоби захираҳои энергетикаи «сабз» истеҳсол карда мешавад
Бонки Исломии Рушд барои татбиқи лоиҳаҳои сармоягузории афзалиятноки Тоҷикистон изҳори омодагӣ намуд
Тоҷикистон ва Хазинаи байналмилалии асъор зери унвони «Воситаи ҳамоҳангсозии сиёсат» барномаи нав оғоз намуданд
Соли 2032 дар Тоҷикистон барои 100 фоиз таъмин шудани истеҳсоли барқ аз ҳисоби манбаъҳои барқароршаванда, яъне энергияи «сабз» имкон фароҳам меояд
ФОРУМИ БАХШИ ХУСУСӢ. Он ба пешрафт ба сӯи Ҳадафи шашуми рушди устувор – об ва беҳдошт дар Осиёи Марказӣ мусоидат менамояд
Эмомалӣ Раҳмон: «Ҷиҳати ислоҳоти соҳаи обтаъминкунӣ ва беҳдошти замин механизмҳои нави маблағгузорӣ таҳия ва амалӣ карда шаванд»
Муҳаммад Сулаймон Ал-Ҷассер: «Мо татбиқи лоиҳаи сохтмони НБО-и «Роғун»-ро ҷонибдорӣ менамоем»

Маводҳои таҳлилӣ