Дар шаҳрҳои Исфара ва Конибодом ба иштирокчиёни ҷанги солҳои 1941-1945 кумакпулии яквақта расонида шуд

ДУШАНБЕ, 08.05.2024. /АМИТ «Ховар»/. Муовини Сарвазири Ҷумҳурии Тоҷикистон Дилрабо Мансурӣ ва роҳбарияти вилояти Суғд дар арафаи Рӯзи Ғалаба ба дидорбинии собиқадорони ҷангу меҳнати шаҳрҳои Исфара ва Конибодом рафтанд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.

Нахуст аз ҳоли сокини 98-солаи шаҳри Конибодом, иштирокчии ҷанги солҳои 1941-1945 Абдуваҳҳоб Махкамов хабар гирифтанд. Зимни суҳбат иброз гардид, ки диловариву ҷонфидоӣ, корнамоӣ ва қаҳрамониҳои фарзандони фарзонаи Ватан дар саҳифаҳои таърих абадан сабт гардида, барои насли ҷавони имрӯза намунаи ибрат аст.

Ба иштирокчии ҷанг аз номи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба миқдори 40 000 сомонӣ кумакпулии яквақта дода шуд.

Сипас ба якчанд нафаре, ки дар ақибгоҳ меҳнати фидокорона намудаанд, аз номи Пешвои миллат муҳтарам Эмомалӣ Раҳмон, роҳбарияти вилоят ва шаҳрҳои Конибодому Исфара кумакҳои пулӣ супорида шуданд.

АКС: Хадамоти матбуоти Раиси вилояти Суғд