ҶОМИ ҶАҲОН-2026. Дастаи мунтахаби Тоҷикистон аввалин тамринҳоро дар Аммон доир намуд

ДУШАНБЕ, 04.06.2024 /АМИТ «Ховар»/. Дастаи мунтахаби Тоҷикистон оид ба футбол дар доираи омодагӣ ба бозии панҷуми даври дуюми марҳилаи интихобии Ҷоми ҷаҳон-2026 дар гурӯҳи «G» тамринҳоро ба муқобили тими миллии Урдун дар шаҳри Аммон оғоз намуд, хабар медиҳад АМИТ «Ховар» бо истинод ба Федератсияи футболи Тоҷикистон.

3 июн дастаи мунтахаби Тоҷикистон дар ҳайати пурра ҷамъ шуд. Ба даста Ваҳдат Ҳанонов («Персеполис», Эрон), Зоир Ҷӯрабоев, Манучеҳр Сафаров (ҳарду аз «Нефтчӣ», Узбекистон), Шаҳром Самиев («Андиҷон», Узбекистон) ва Фатҳулло Олимзода («Атирау», Қазоқистон) дохил шуданд.

Ёдовар мешавем, ки бозии дастаҳои мунтахаби Урдун ва Тоҷикистон 6 июн дар Варзишгоҳи байналмилалии Аммон баргузор шуда, соати 20:30 ба вақти маҳаллӣ (соати 22:30 ба вақти Душанбе) оғоз мешавад.

АКС: Федератсияи футболи Тоҷикистон