Дар Тоҷикистон Ҷаласаи гурӯҳи электорати Хазинаи байналмилалии асъор ва Бонки ҷаҳонӣ оғоз гардид

ДУШАНБЕ, 02.07.2024 /АМИТ «Ховар»/. Имрӯз дар маркази таълимии Бонки миллии Тоҷикистон — Маҷмааи «Хуталон», воқеъ дар ноҳияи Варзоб таҳти роҳбарии муовини якуми Сарвазири мамлакат Ҳоким Холиқзода Ҷаласаи гурӯҳи электорати Хазинаи байналмилалии асъор ва Бонки ҷаҳонӣ ба кори худ оғоз намуд, хабар медиҳад мухбири АМИТ «Ховар» аз ҷараёни баргузории ин ҳамоиш.

Нимаи дуюми рӯз дар Маҷмааи «Хуталон» баргузории семинари сатҳи баланд (Панели 1) дар мавзуи «Иқтисодиёти сабз -ҳамчун алтернатива барои рушди иқтисодиёти ҷаҳон» дар назар дошта шудааст. Дар ҳамин ҷо ҳамчунин семинари сатҳи баланд (Панели 2) дар мавзуи «Рақамикунонӣ – ҳамчун тамоюли рушди иқтисоди миллӣ ва ҷомеаи муосир» доир мегардад.

Ёдовар мешавем, ки аз 1 то 3 июл дар Тоҷикистон Ҷаласаи гурӯҳи электорати Хазинаи байналмилалии асъор ва Бонки Ҷаҳонӣ баргузор мешавад.

Тафсилоти бештар дар ин мавзуъ дар хабарҳои минбаъда пешниҳод мегардад.

АКС: АМИТ «Ховар»