ИСТИФОДАИ САМАРАНОКИ ЗАМИН. Дар хоҷагии деҳқонии «Ҷӯра Саркор»-и шаҳри Турсунзода барои аз замин дар як сол ду-се ҳосил рӯёндан талош менамоянд
ТУРСУНЗОДА, 10.07.2024 /АМИТ «Ховар»/. Замини хоҷагии деҳқонии мо аз 7 гектар иборат буда, 6 гектари онро боғи ангур ташкил медиҳад. Дар 30 сотих гармхона бунёд намуда, дар он бодиринг, помидор ва булғорӣ парвариш кардем. Маҳсулоти дар гармхона парваришнамудаамонро ҷамъоварӣ намуда, ба фурӯш баровардем. Фақат аз аввали фасли баҳор то гармшавии боду ҳаво дар гармхона 100 тонна ангишт истифода намудем. Аммо меҳнати софдилона ва ҳосили фаровони замини гармхона хароҷоти ангишту кормандони кирояро пӯшонид ва фоидаи хуб ба даст овардем, -гуфт роҳбари хоҷагии деҳқонии «Ҷӯра Саркор»-и Ҷамоати Ҷура Раҳмони шаҳри Турсунзода Рустам Раҳмонов.
«Дар 70 сотихи замини боқимонда кишти тарбузро ба роҳ мондем, ки аз он ҳосили фаровон ба даст оварда, барои фурӯш ба бозорҳои мамлакат пешниҳод намуда истодаем. Хосияти замин ҳамин аст, ҳар касе холисонаю содиқона меҳнат намояд, ҳосили фаровон ба даст меорад. Аммо ҳосили фаровон, ки ба даст омад, бояд ҳаққи ятиму камбағалу бечораро ҷудо намоӣ. Он гоҳ баракати кор зиёд мешавад», -афзуд Рустам Раҳмонов.
Номбурда изҳор дошт, ки хоҷагии деҳқонии «Ҷӯра Саркор» дар доираи татбиқи яке аз ҳадафҳои стратегии мамлакат, ки таъмини амнияти озуқавории ҷумҳурӣ мебошад, таъсис дода шудааст. Ҳадафи асосии кормандони хоҷагӣ ин самаранок истифода намудани замин ва аз он ба даст овардани ҳосили фаровон ва пур намудани дастархони сокинони мамлакат мебошад.
Ба гуфти Рустам Раҳмонов, соли гузашта боғи токи хоҷагӣ аз ҳисоби сардии зиёд қисман талаф ёфта буд. Хушбахтона, имсол бо истифодаи қоидаҳои агротехникӣ ва саривақт таъмини ғизои иловагӣ боғи ток ҳосили фаровон дорад ва дар ғанӣ намудани бозори ҷумҳурӣ мусоидат менамояд. Барои коркарди боғи ток ҳамарӯза 15 корманди кироя дар хоҷагӣ фаъолият менамоянд ва дар баробари ин Рустам Раҳмонов фарзандону ҷиянҳои худро нозукии касби деҳқониро меомӯзад.
Деҳқони ҷавони ин хоҷагӣ Аҳмад Улаев гуфт, ки барои ҳосили фаровон гирифтан бояд деҳқон аз хароҷот кардан натарсад. Албатта барои осонии кор аввал техникаҳои кишоварзӣ ва мошинолот харидорӣ кардан даркор ва баъдан барои бо ғизо ва заҳрхимикатҳо таъмин намудани токзорҳо ва помидор, бодирингу булғорӣ маблағи калон хароҷот мекунӣ, ки ҳосили фаровон ба даст оварда, сатҳи зиндагии худро хуб гардонӣ.
«Агар деҳқон мувофиқи вақти муайяншуда, заминро самаранок истифода барад, аз он дар як сол ду- се ҳосил рӯёнад, хонаводаи худ ва хешу табору ҳамсоягонашро бо маҳсулоти ройгон таъмин карда метавонад. Дар баробари ин ба бозорҳои ҷумҳурӣ маҳсулоташро барои фурӯш пешниҳод намуда, фоидаи хуб ба даст меорад»,- мегӯяд Аҳмад Улаев .
Субҳониддини МАҲМУД,
АМИТ «Ховар»
АКС: АМИТ «Ховар»
ДАР ТОҶИКИСТОН БО КАДОМ РОҲ ЗАМИНҲОИ КОРАМРО ЗИЁД МЕГАРДОНАНД? Мутахассисони соҳа ин мавзуъро шарҳ медиҳанд
ЛОИҲАИ ҲАРАКАТИ OVOP. Он метавонад дар Тоҷикистон ба таъсиси ҷойи кор дар деҳоти дурдаст мусоидат намояд
Дар Тоҷикистон 61 фоизи заминҳо ба системаи биллингӣ ворид карда шудаанд
Тақвияти муносибатҳои тиҷоратии Тоҷикистон ва Покистон баррасӣ гардид
Дар Тоҷикистон ҳаҷми маблағи хизматрасонӣ барои нафақагирон сол то сол меафзояд
Дар Панҷакент вобаста ба истифодаи босамари замин ҷаласа баргузор шуд
Дар Душанбе ҳамкории Тоҷикистон ва Шоҳигарии Арабистони Саудӣ дар самти содирот баррасӣ шуд
Имконоти сайёҳии Тоҷикистон дар ҳамоиши байналмилалӣ дар Эрон муаррифӣ шуданд
Дар Душанбе масъалаи густариши ҳамкории иқтисодӣ ва тиҷоратӣ байни Тоҷикистон ва Эфиопия баррасӣ шуд
Гурӯҳи кории Ҳукумати Тоҷикистон бо вазъи соҳаи кишоварзӣ дар ноҳияи Деваштич шинос гардид
«КИШВАРИ САБЗ». Дар ин парваришгоҳ зиёда аз 100 намуди гулу буттаҳои нодир ва 40 намуди ниҳоли дарахтони ороишӣ парвариш мешавад
Ширкати «Carpi» дар бунёди неругоҳҳои барқи обӣ дар дарёи Зарафшон иштирок менамояд
