Дар ноҳияи Зафаробод коргоҳи истеҳсоли мумфарш ба фаъолият оғоз намуд

ДУШАНБЕ, 23.08.2024. /АМИТ «Ховар»/. Дар шаҳраки Зафарободи ноҳияи Зафаробод коргоҳи истеҳсоли мумфарши Ҷамъияти саҳомии кушодаи «Ҷасур» ба фаъолият оғоз намуд. Тамғаи асфалти истеҳсолшаванда дар ин коргоҳ «БЗ 117» буда, ҳаҷми истеҳсоли маҳсулот дар як соат 30 тоннаро ташкил медиҳад. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.

Ҳамчунин дар роҳи кӯчаи «Байналмилал»-и шаҳраки Зафаробод мумфаршкунии роҳ оғоз гардид. Дарозии роҳи мумфаршшаванда 600 метр ва паҳноиаш 5 метр буда, масоҳаташ 3000 метри мураббаъро ташкил медиҳад.

Хароҷоти умумии мумфаршкунии роҳ зиёда аз 260 ҳазор сомонӣ мебошад.

Ёдовар мешавем, ки имрӯзҳо бахшида ба 35-солагии Истиқлолияти давлатии Тоҷикистон дар шаҳраку  маҳал ва кӯчаву хиёбонҳои шаҳру ноҳияҳои мамлакат корҳои ободониву бунёдкорӣ идома доранд. Соҳибкорону сокинон саъй доранд, ки бо ин амал дар ободонии  маҳал саҳми назаррас гузоранд.

АКС: Хадамоти матбуоти Раиси вилояти Суғд