Дар шаҳри Истаравшан пули мошингузар ба истифода дода шуд

ДУШАНБЕ, 25.08.2024. /АМИТ «Ховар»/. Дар доираи нақшаи чорабиниҳои Мақомоти иҷроияи ҳокимияти давлатии шаҳри Истаравшан оид ба таҷлили ҷашни 33-солагии Истиқлоли давлатӣ дар болои сойи «Зарринрӯд»-и ноҳия пули мошингузар ба истифода дода шуд. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.

Пули мошингузар бо харҷи беш аз 130 000 сомонӣ бо дастгирии сокинони деҳаи Вогати деҳоти «Сабристон» бунёд гардида, дар он саҳми оилаҳое, ки нияти сафари ҳаҷҷи такрорӣ доштанд, низ назаррас аст. Яъне, сокинон маблағҳои бо нияти ҳаҷ ҷамъоварӣ кардаашонро дар бунёди пул ва мумфаршкунии роҳҳои деҳа харҷ намуданд.

Ҳамзамон мумфаршкунии қариб 1 км роҳи дохилии деҳаи Вогат оғоз шуд, ки ин иқдом низ бо дастгирии сокинон анҷом дода шуда, дар ин самт беш аз 350 000 сомонӣ маблағ сарф мегардад.

АКС: Хадамоти матбуоти Раиси вилояти Суғд