Ҷоизадорони Бозиҳои олимпии Париж-2024 дар вазъияти тантанавӣ қадрдонӣ шуданд
ДУШАНБЕ, 15.08.2024. /АМИТ «Ховар»/. Имрӯз дар шаҳри Душанбе бахшида ба ҷашни 33-солагии Истиқлолияти давлатии Ҷумҳурии Тоҷикистон ва Рӯзи варзишгарони Тоҷикистон барномаи фарҳангӣ-фароғатӣ баргузор гардида, дар вазъияти тантанавӣ ба се нафар ҷоизадорони Бозиҳои олимпии Париж-2024 мукофоти пулӣ ба маблағи 10 000 доллари ИМА супорида шуд, иттилоъ медиҳад АМИТ «Ховар».
Инчунин ба се ҷоизадори Бозиҳои олимпии Париж-2024 Сомон Маҳмадбеков, Темур Раҳимов ва Давлат Болтаев унвони Устоди шоистаи варзиши Ҷумҳурии Тоҷикистон дода шуд.
Ба мураббиёни ҷоизадорони Бозиҳои олимпии Париж-2024 мукофоти пулӣ дар ҳаҷми 10 000 сомонӣ ва унвони Корманди шоистаи тарбияи ҷисмонӣ ва варзиши Ҷумҳурии Тоҷикистон дода шуд.
Ҳамзамон ҳамаи 14 нафар варзишгароне, ки Тоҷикистонро дар Бозиҳои олимпии Париж-2024 муаррифӣ намуданд, бо мукофотҳои пулӣ ва туҳфаҳо ҳавасманд гардонида шуданд.
Зимни ҳамоиш инчунин собиқадорони варзиш, мураббиён ва варзишгарони шинохтаи мамлакат бо туҳфаҳо қадрдонӣ шуданд.
Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа иброз дошт, ки соҳаи варзиш зери таваҷҷуҳи доимии Ҳукумати Ҷумҳурии Тоҷикистон қарор дошта, самти афзалиятнок ба ҳисоб меравад. Ҳамин аст, ки ҳамасола заҳмату талош ва меҳнатҳои масъулини соҳаи варзиш ва варзишгарони мамлакат қадрдонӣ мешаванд.
Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон изҳор дошт, ки соҳаи тарбияи ҷисмонӣ ва варзиш яке аз рукнҳои арзишмантарин ва муҳимтарини ҷомеа барои тарбияи насли наврас ва инсоният ба ҳисоб меравад. Зеро мақсади асосии тарбияи ҷисмонӣ ва варзиш танҳо аз таҳкими саломатии инсон иборат нест, балки он бо тарбияи меҳнатӣ, ақлӣ, ахлоқӣ ва эстетикӣ низ пайванди ногусастанӣ дошта, муаррифи давлату миллат дар арсаи байналмилалӣ мебошад.
Ёдовар мешавем, ки 14 август ба се ҷоизадори Бозиҳои олимпӣ — Давлат Болтаев, Сомон Маҳмадбеков ва Темур Раҳимов калиди хонаҳо тақдим гардид, ки дар ин хусус қарори Раиси шаҳри Душанбе муҳтарам Рустами Эмомалӣ ба тасвиб расидааст.
Дар маросими супоридани мукофотҳои давлатӣ ҳар ҷоизадори Бозиҳои олимпии Париж-2024 соҳиби мукофоти давлатӣ — Ордени Шараф, дараҷаи II, 200 ҳазор сомонӣ — Ҷоизаи Президенти Ҷумҳурии Тоҷикистон, хонаи истиқоматӣ ва мошини муосири барқӣ гардид.
Зарангези ЛАТИФ,
Тоҳири САИД (АКС),
АКС: АМИТ «Ховар»
Дастаи мунтахаби наврасони Тоҷикистон (U-16) оид ба футбол дар «Ҷоми рушд-2026» ҷойи панҷумро соҳиб гардид
Дастаҳои футболи Тоҷикистон бо дастурҳои навшудаи доварон барои мавсими 2026 шинос шуданд
35-СОЛАГИИ ИСТИҚЛОЛИ ДАВЛАТӢ. Дар ноҳияи Вахш корхонаи истеҳсоли маҳсулоти полиэтиленӣ ба фаъолият оғоз намуд
Дар Душанбе оид ба ҳуқуқҳои байналмилалии футбол ва идоракунии бошгоҳҳо машғулият баргузор гардид
35-СОЛАГИИ ИСТИҚЛОЛИ ДАВЛАТӢ. Дар Бадахшон корҳои созандагию бунёдкорӣ вусъат меёбанд
СОЛИ ОБОДОНИВУ СОЗАНДАГӢ. Дар ҳудуди ёдгориҳои таърихии ноҳияи Данғара ҳашари тозагӣ ва сабзкорӣ гузаронида шуд
Дастаи «Ҳулбук»-и Восеъ ғолиби Ҷоми Федератсияи футболи Тоҷикистон-2026 шуд
ҶОМИ ФФТ-2026. Имрӯз бозии финалии дастаҳои «Барқчӣ»-и Ҳисор ва «Ҳулбук»-и Восеъ доир мегардад
ФУТБОЛ. Дастаи мунтахаби наврасони Тоҷикистон дар мусобиқаи «Ҷоми рушд-2026» иштирок мекунад
Ҷоизаи Президенти Ҷумҳурии Тоҷикистон дар ҳаҷми зиёда аз 2 миллион сомонӣ ба варзишгарони муваффақ тақдим гардид
АРТИШИ МИЛЛӢ — КАФИЛИ ИСТИҚЛОЛИ ДАВЛАТӢ. Дар Донишкадаи тарбияи ҷисмонӣ Рӯзи таъсиси Қувваҳои Мусаллаҳи Тоҷикистонро таҷлил намуданд
Дар Душанбе маросими ҷоизасупорӣ дар соҳаи тарбияи ҷисмонӣ ва варзиш баргузор мегардад
