«Россотрудничество» ба Мактаб-интернати ҷумҳуриявии кӯдакони ятими Шаҳринав 300 номгӯй китоб тақдим намуд

ДУШАНБЕ, 11.08.2024 /АМИТ «Ховар»/. Аз ҷониби намояндагии «Россотрудничество» дар Тоҷикистон ба Муассисаи давлатии таълимии «Мактаб-интернати ҷумҳуриявии кӯдакони ятими ноҳияи Шаҳринав» 300 номгӯй адабиёти бачагонаи русӣ ва теъдоди зиёди барномаву дастурамалҳои омӯзиши забони русӣ тақдим гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Шаҳринав хабар медиҳад.

Зимни супоридани адабиёти бачагона роҳбари намояндагии «Россотрудничество» Андрей Патрушев гуфт, ки ҳадафи онҳо ба роҳ мондани ҳамкории байналхалқӣ дар самти гуманитарӣ буда, мақсад аз он ҳифзу рушди забони русӣ мебошад.

Ҳамзамон барои омодакунӣ ва дар оянда таҳсил намудани хонандагони ин мактаб-интернат дар донишгоҳу донишкадаҳои федератсияи Русия байни намояндагии «Россотрудничество» ва мактаб-интернат шартномаи ҳамкорӣ баста шуд.

АКС: Мақомоти иҷроияи ҳокимияти давлатии ноҳияи Шаҳринав