33-СОЛАГИИ ИСТИҚЛОЛИ ДАВЛАТӢ. Дар ноҳияи Рӯдакӣ корхонаи саноатӣ, бунгоҳи тиббӣ ва бинои баландошёна ба истифода дода шуд

РӮДАКӢ, 08.09.2024 /АМИТ «Ховар»/.  Ба истиқболи ҷашни 33-солагии Истиқлоли давлатии Ҷумҳурии Тоҷикистон  дар деҳаи Қиблаии Ҷамоати деҳоти Қиблаии ноҳияи Рӯдакӣ корхонаи нави саноатӣ ба фаъолият оғоз намуд. Дар ин хусус  ба хабарнигори АМИТ «Ховар» Субҳониддини Маҳмуд  дар Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Корхонаи нави саноатӣ маҳсулоти полимирӣ (ПИК) истеҳсол намуда, бо саҳми соҳибкори ватанӣ Ҷӯрахон Рабиев ва дастгирии Мақомоти иҷроияи ҳокимияти давлатии ноҳияи Рӯдакӣ сохта шудааст. Дар айни замон дар корхона 12 нафар бо ҷойи кори доимӣ таъмин гардида, барои онҳо шароити мусоиди кор, ҷойи хоб ва хӯроки гарм муҳайё шудааст.

Дар доираи ин ҷашни давлатӣ дар деҳаи Гулисойи Ҷамоати деҳоти Лоҳур бунгоҳи замонавии тиббӣ ва дар маркази ноҳияи Рӯдакӣ — шаҳраки Сомониён бинои истиқоматии баландошёна мавриди истифода қарор дода шуд.

Ҳамчунин дар дигар ҷамоатҳои шаҳраку деҳоти ноҳияи Рӯдакӣ иншооти ҷашнӣ ифтитоҳ мешаванд.

АКС: Мақомоти иҷроияи ҳокимияти давлатии ноҳияи Рӯдакӣ