СИТРУСПАРВАРӢ. Водии Вахши Тоҷикистон барои парвариши меваи грейпфрут мусоид аст

ДУШАНБЕ, 25.09.2024 /АМИТ «Ховар»/. Иқлими водии Вахши Тоҷикистон барои парвариши меваи грейпфрут мусоид аст. Аз ин рӯ чанд сол мешавад, ки дар ин водӣ навъи беҳтарини грейпфрут парвариш меёбад.

Тавре ба АМИТ «Ховар» дар Институти боғпарварию сабзавоткории Академияи илмҳои кишоварзии Тоҷикистон иттилоъ доданд, дар бунгоҳи таҷрибавии зироати субтропикии Вахш чанд навъи грейпфрут мавҷуд аст. Дар як сол аз ҳар бехи он 100—120 дона мева гирифта мешавад.

Дарахти грейпфрут серхор буда, аз 8 то 12 метр баландӣ дорад.  Баргаш калон, байзашакл, ҷилодор ва гулаш сафеди калони хушбӯй аст. Мевааш калон буда, ранги сурча дорад, пӯсташ ғафси зардча, мағзаш сероб ва ширини туршмазза аст.

Грейфрутро дар ватани мо дар гармхонаҳо парвариш менамоянд. Аз моҳи март то оғози зимистон болояш кушода мемонад, то аз Офтоб хуб ғизо гирад.  Ин мева ба ҳавои хунук тобовар нест.

Ба тавсияи табибон, дар таркиби меваи грейпфрут 1-2,5 фоиз кислотаҳои органикӣ, 5-10 фоиз қанд, ба миқдори зиёд витамини А, С ва Е мавҷуд ҳастанд. Шарбати грейпфрут иштиҳоовар буда, барои муолиҷаи бемориҳои сироятӣ ва дил (миокардит, эндокардит) манфиатбахш аст.

Инчунин аз пӯсти он равғани махсус ҳосил мекунанд, ки метавонад дарди сар ва асабониятро коҳиш диҳад. Дар давраи тирамоҳу зимистон истеъмоли грейпфрут норасоии витаминҳоро дар бадани инсон пешгирӣ карда, системаи масуниятро мустаҳкам менамояд.

 АКС аз манбаъҳои боз