Ҳамкории Донишгоҳи байналмилалии забонҳои хориҷии Тоҷикистон бо донишгоҳҳои хориҷӣ густариш меёбад

ДУШАНБЕ, 17.10.2024. /АМИТ «Ховар»/. Масъалаи забономӯзии донишҷӯёни Донишгоҳи байналмилалии забонҳои хориҷии Тоҷикистон ба номи Сотим Улуғзода ва донишгоҳҳои Ҷумҳурии Ҳиндустон, инчунин табодули таҷриба ва ба имзо расонидани созишномаҳои ҳамкорӣ дар вохӯрии ректори Донишгоҳи байналмилалии забонҳои хориҷии Тоҷикистон Жило Гулназарзода бо Сафири Фавқулода ва Мухтори Ҷумҳурии Ҳиндустон дар Ҷумҳурии Тоҷикистон Роҷеш Уики баррасӣ гардид. Дар ин хусус ба АМИТ «Ховар» дар ин донишгоҳ хабар доданд.

Иброз гардид, ки дар муассиса барои донишомӯзон бобати омӯхтани забонҳои хориҷӣ, аз ҷумла забони ҳиндӣ тамоми имконияти зарурӣ фароҳам гардидааст.

Ҷонибҳо ҳамчунин барои боз ҳам беҳтар ба роҳ мондани робитаҳои судманди донишгоҳ бо муассисаҳои олии Ҷумҳурии Ҳиндустон табодули назар намуданд.

Дар доираи вохӯрӣ бахшида ба 32-солагии робитаҳои дипломатии Ҷумҳурии Тоҷикистон ва Ҷумҳурии Ҳиндустон «Ҳафтаи забони ҳиндӣ» баргузор гардид.

Инчунин ба омӯзгорони фаъолу ғолибони озмуни «Ҳафтаи забони ҳиндӣ» Сипоснома ва туҳфаҳои хотиравӣ супорида шуданд.

АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода