«БРАМОМ-4». Ҳайати Бонки ҷаҳонӣ бо натиҷаҳои миёнамуҳлати лоиҳа шинос гардид

ДУШАНБЕ, 13.11.2024. /АМИТ «Ховар»/. Натиҷаҳои миёнамуҳлати лоиҳаи «Беҳдошти роҳҳои алоқаи минтақавӣ дар Осиёи Марказӣ» («БРАМОМ-4») зимни вохӯрии Вазири нақлиёти Ҷумҳурии Тоҷикистон Азим Иброҳим ва ҳайати Бонки ҷаҳонӣ таҳти роҳбарии Абдул Ҳамид Халилӣ баррасӣ гардиданд. Дар ин хусус ба АМИТ «Ховар» дар Вазорати нақлиёти Ҷумҳурии Тоҷикистон хабар доданд.

Вазири нақлиёт иброз дошт, ки ин марҳила махсус буда, ки барои арзёбии ҳадафҳои ибтидоии рушди лоиҳа, аҳамият ва дараҷаи расидан ба онҳо муносибати ҳамаҷониба талаб мекунад.

Таъкид шуд, ки татбиқи лоиҳа дар сохтмони қитъаҳои роҳҳо дар Вилояти Мухтори Кӯҳистони Бадахшон 58,1 фоизро ташкил дод, ки 6,71 фоиз аз нишондиҳандаи нақшавӣ бештар аст. Дар қитъаҳои роҳҳои вилояти Суғд иҷрои нақша 46,01 фоизро ташкил медиҳад.

«Умедворем, ки бо дастгирии фаъолонаи Гурӯҳи Бонки ҷаҳонӣ мо ба татбиқи Лоиҳаи марҳилаи чоруми Барномаи беҳдошти роҳҳои минтақавии алоқа дар Осиёи Марказӣ  муваффақ мегардем», — изҳор дошт Вазири  нақлиёт.

Ҷонибҳо масоили вобаста ба лоиҳаи «БРАМОМ-4», инчунин дар доираи ин лоиҳа маблағгузории таҷдиди роҳи 32-километраи «Гулистон-Кӯлоб»-ро дар вилояти Хатлон баррасӣ  намуданд.

Ёдовар мешавем, ки ҳайати Бонки ҷаҳонӣ аз 11 то 29 ноябри соли равон бо мақсади шиносоӣ бо ҷараёни корҳо дар татбиқи марҳилаи чоруми лоиҳаи «Беҳдошти роҳҳои алоқаи минтақавӣ дар Осиёи Марказӣ, БРАМОМ-4» ва омода намудани ҳисоботи миёнамуҳлати лоиҳа бо Гурӯҳи татбиқи лоиҳаи Вазорати нақлиёти Тоҷикистон ва шарикону мушовирон якчанд мулоқот доир мекунад. То охири ҳафта гурӯҳи корӣ барои шиносоӣ бо  сохтмон дар 4 қитъаи роҳ ба вилояти Суғд сафар мекунад.

Дар доираи татбиқи марҳилаи 1-уми лоиҳаи «Беҳдошти роҳҳои алоқаи минтақавӣ дар Осиёи Марказӣ, БРАМОМ-4» дар Вилояти Мухтори Кӯҳистони Бадахшон сохтмони пул аз болои дарёи Ғунд, воқеъ дар шаҳри Хоруғ ва сохтмони роҳҳои ба он пайвастшаванда, бунёди роҳи автомобилгард дар мавзеи Барсеми ноҳияи Шуғнон бо дарозии 3,4 км бо назардошти сохтмони ду долони зиддитармавӣ ва сохтмони як пул пешбинӣ шудааст.

Дар ҳудуди вилояти Суғд навсозӣ ва таҷдиди 4 қитъаи роҳи автомобилгарди «Куруш–Бекобод», «Деҳмой–Ғафуров», «Ғафуров–Хистеварз» ва «Конибодом–Кучкак» бо дарозии умумии 51,2 км ба нақша гирифта шудааст.

Дар доираи марҳилаи  2-юми лоиҳа баланд бардоштани сатҳи низоми идоракунии дороиҳои роҳ тавассути таҳвил ва насби тарозуҳои баркашии вазни воситаҳои нақлиёт ҳангоми ҳаракат (weigh-in-motion; WIM) дар қитъаҳои алоҳида, насби бастаҳои барномавие, ки барои таъмини баҳисобгирӣ, нигоҳдорӣ ва таҳлили маълумот дар бораи ҳолати шабакаи роҳҳои автомобилгард, шиддатнокии ҳаракат дар роҳ, мувоҷеҳ шудан бо хатарҳои табиӣ ва тартиб додани нақшаҳои  тадбирҳои  аввалиндараҷа оид ба нигоҳдории техникӣ ва таъмир пешбинӣ шудаанд, амалӣ карда мешавад.

Инчунин дар доираи ин марҳила таъмини бехатарии ҳаракат дар роҳ тавассути дастгирии Раёсати Бозрасии давлатии автомобилӣ дар баланд бардоштани сатҳи истифодаи тасмаи бехатарӣ дар нақлиёт, таҳияи Стратегияи баланд бардоштани бехатарии ҳаракат дар роҳ ва таъсиси Обсерваторияи бехатарии ҳаракат дар роҳ, мустаҳкамкунӣ ва сохтмони панҷараҳои муҳофизатӣ дар қитъаҳои алоҳидаи роҳҳои автомобилгард дар маҳалҳои мураккаби кӯҳӣ дар назар дошта шудааст.

АКС: Вазорати нақлиёти Ҷумҳурии Тоҷикистон