Дар Исфара оид ба ташаббусҳои Президенти Тоҷикистон дар рушди сайёҳӣ ҳамоиш баргузор шуд

ДУШАНБЕ, 14.11.2024 /АМИТ «Ховар»/. 13 ноябр дар шаҳри Исфара бахшида ба Рӯзи Президенти Ҷумҳурии Тоҷикистон ва 32-солагии Иҷлосияи XVI Шурои Олии Ҷумҳурии Тоҷикистон дар мавзуи «Ташаббусҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди соҳаи сайёҳии мамлакат» ҳамоиши минтақавӣ баргузор гардид. Дар ин хусус ба АМИТ «Ховар» дар  Кумитаи рушди сайёҳии назди Ҳукумати Ҷумҳурии Тоҷикистон иттилоъ доданд.

Раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муминзод иброз намуд, ки 16 ноябри соли 1992  Иҷлосияи XVI Шурои Олии Ҷумҳурии Тоҷикистон доир гардида, дар он муҳтарам Эмомалӣ Раҳмон ҳамчун Раиси Шурои Олӣ масъулияти роҳбарии мамлакатро ба уҳда гирифтанд. Давоми ин муддат миллати сарбаланди тоҷик ба дастовардҳои беназири иқтисодиву иҷтимоӣ ноил гардид.

Дастовардҳои Тоҷикистон дар самти соҳаи сайёҳӣ идомаи натиҷаҳои сиёсати Пешвои миллат дар муаррифии мардум ва сарзамини тоҷикон дар арсаи байналмилалӣ мебошанд.

Бо шарофати иқдому  ташаббусҳои Сарвари давлат оид ба рушди сайёҳии мамлакат мавқеи сайёҳии Ҷумҳурии Тоҷикистон дар раддабандиҳои ҷаҳонӣ сол то сол баланд мешавад.

АКС: Кумитаи рушди сайёҳии назди Ҳукумати Ҷумҳурии Тоҷикистон