Аз ҷониби сармоягузорони Чин ба иқтисодиёти Тоҷикистон 2,6 миллиард доллар сармоя ворид шудааст

Декабрь 2, 2024 15:36

ДУШАНБЕ, 02.12.2024. /АМИТ «Ховар»/. Дар 10 соли охир аз ҷониби сармоягузорони Ҷумҳурии Мардумии Чин ба иқтисодиёти Тоҷикистон 2,6 миллиард доллар сармоя ворид гардидааст, ки беш аз 57 фоизи онро сармояи мустақим ташкил медиҳад. Дар ин хусус имрӯз муовини якуми Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Фаррух Юсуфзода зимни баргузории ҳамоиш бо иштироки роҳбарону намояндагони ширкатҳои сармоягузорию саноатии Ҷумҳурии Мардумии Чин иттилоъ дод.

Фаррух Юсуфзода иброз дошт, ки бо мақсади васеъ намудани ҷуғрофияи ҷалби сармоя ва содагардонии воридшавӣ ба иқтисодиёти мамлакат мунтазам ислоҳоти зарурӣ гузаронида шуда, зери сиёсати хирадмандонаи Пешвои миллат муҳтарам Эмомалӣ Раҳмон дар Тоҷикистон сиёсати «дарҳои кушод» амалӣ мегардад.

«Барои беҳтар намудани фазои сармоягузорӣ ва дастрасу сода гардонидани расмиёти маъмурӣ мунтазам чораҷӯӣ карда мешавад. Хусусан дар доираи ислоҳоти гузаронида фаъолияти соҳибкорӣ дар мамлакати мо ба таври электронӣ ва ройгон ба қайд гирифта шуда, фаъолияти соҳибкорӣ дар 24 соат ба таври ғайринақдӣ ва электронӣ сабт мешавад. Инчунин ба талаботи муосир ҷавобгӯ гардонидани қонунгузории татбиқкунандаи фаъолияти бахши хусусӣ самти дигари ислоҳот дар Тоҷикистон маҳсуб мешавад»,-афзуд мавсуф.

Таъкид шуд, ки дар асоси Қонуни Ҷумҳурии Тоҷикистон «Дар бораи сармоягузорӣ» барои сармоягузорони хориҷӣ кафолатҳо ва шароити мусоиди фаъолият дода мешавад. Сармоягузорони хориҷӣ ҳуқуқи ба берун аз ҳудуди Тоҷикистон интиқол додани маблағи даромад бо асъори хориҷии дар натиҷаи фаъолияти сармоягузорӣ ба дастовардаро доранд ва бобати анҷом додани дигар амалиёти асъорӣ ба онҳо кафолати қонунӣ пешбинӣ гардидааст.


Зимни баргузории ҳамоиш иброз гардид, ки дар ҷаҳони муосир рушди соҳибкорию сармоягузорӣ асоси пешрафти иқтисодии ҳар кишвар ба ҳисоб рафта, дастгирии ҳамаҷониба ва фароҳам овардани шароити мусоид дар сиёсати иқтисодии бисёр давлатҳо, аз ҷумла Тоҷикистон афзалият дорад.

«Мо манфиатдорем, ки байни доираҳои тиҷоратии Тоҷикистон ва Чин, аз ҷумла соҳибкорони музофоти Синзсян робитаҳои мутақобили судмандро тақвият  диҳем. Боварӣ дорам, ки тақвияти ин ҳамкорӣ дар соҳаҳои гуногун ба манфиати ҳарду давлат мебошад»,-баён дошт Фаррух Юсуфзода.

Бояд гуфт, ки ҷойгиршавии ҷуғрофии Тоҷикистон дар маркази Осиёи Марказӣ аҳамияти стратегӣ дошта, имкон медиҳад, ки пайвандгари давлатҳо дар минтақа гардад.

Дар ҳамоиш гуфта шуд, ки ҷалби сармояи мустақим ва технологияҳои муосир барои истифодаи самараноки захираҳои бузурги гидроэнергетикии Тоҷикистон, ба мамлакати транзитӣ табдил додани он ва таъмини сатҳи баланди некӯаҳволии сокинони мамлакат, инчунин тавсеаи имконияти шуғли онҳо дар соҳаҳои истеҳсолӣ аз ҷумлаи афзалияти ҷумҳурӣ  мебошанд.


Воқеан, имрӯз Ҷумҳурии Тоҷикистон дар заминаи устувории вазъи сиёсӣ, беҳтар шудани нишондиҳандаҳои макроиқтисодӣ, афзудани талаботи бозори дохилӣ, таҳкими иқтидори зеҳниву инсонӣ ва бо назардошти татбиқшавии тадбирҳои ислоҳотӣ дар таърихи соҳибистиқлолӣ аз марҳилаи басе муҳим дар самти фароҳамоварии шароити мусоиди пешбурди фаъолияти сармоягузорӣ ва соҳибкорӣ мегузарад.

Ба ширкатҳои чинӣ иттилоъ дода шуд, ки дар Ҷумҳурии Тоҷикистон 98 фоизи неруи барқ бо истифода аз захираҳои об истеҳсол мегардад. Тоҷикистон аз рӯи фоизи истеҳсоли энергияи «сабз» мамлакати шашуми пешсафи сайёра мебошад. Дар баробари ин, ташаббусҳои ҷаҳонии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти об ҷонибдории дастҷамъонаи ҷомеаи ҷаҳониро ба даст оварда, ба ҳамкории фаъоли ҳама ҷонибҳои манфиатдор дар самти мудирияти захираҳои об ва татбиқи лоиҳаҳо дар соҳаи обу энергетика, инчунин амалисозии фанноварию навовариҳои муосир мусоидат намуданд.

Ёдовар мешавем, ки 21 июли соли равон дар шаҳри Душанбе Форуми сармоягузории Тоҷикистон ва Чин баргузор гардид. Дар ҳошияи он якчанд санад ба маблағи 536 миллион доллар дар соҳаҳои саноат, нақлиёт ва сохтмон ба имзо расонида шуд.

Шаҳлои САДРИДДИН,
АМИТ «Ховар» 

АКС: АМИТ «Ховар»

Декабрь 2, 2024 15:36

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст