ШАҲРУ НОҲИЯҲОИ ТОБЕИ ҶУМҲУРӢ БА ЗИМИСТОНГУЗАРОНӢ ОМОДААНД? Ин масъала дар ҷаласаи Ситоди ҷумҳуриявӣ баррасӣ шуд

ДУШАНБЕ, 07.12.2024. /АМИТ «Ховар»/. 5 декабр ҷаласаи Ситоди ҷумҳуриявӣ оид ба иҷрои қарори Ҳукумати Ҷумҳурии Тоҷикистон аз 30 марти соли 2024 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2024-2025» баргузор гардид, ки дар он омодагии шаҳру ноҳияҳои тобеи ҷумҳурӣ ба зимистонгузаронӣ мавриди баррасӣ қарор дода шуд.

Тавре дар Вазорати рушди иқтисод ва савдои ҷумҳурӣ ба АМИТ «Ховар» хабар доданд, ҷаласа таҳти раисии муовини Сарвазири Ҷумҳурии Тоҷикистон- раиси ситод Усмоналӣ Усмонзода баргузор шуд.

Дар ҷаласа намояндагони вазорату идораҳои соҳавӣ — аъзои Ситоди ҷумҳуриявӣ тариқи ҳузурӣ ва роҳбарону масъулини мақомоти иҷроияи ҳокимияти давлатии вилояти Суғд ва шаҳру ноҳияҳои он тариқи маҷозӣ иштирок намуданд.

Бо мақсади омӯзиши ҳолати воқеии ҷараёни иҷрои ин қарор тибқи супориши Ҳукумати Ҷумҳурии Тоҷикистон гурӯҳи корӣ аз ҳисоби намояндагони вазорату идораҳои дахлдори соҳавӣ таъсис дода шуда, ба шаҳру ноҳияҳои тобеи ҷумҳурӣ сафар намуд.

Аз ҷараёни иҷрои қарор ва омодагии соҳаҳои иқтисодиёту иҷтимоиёти вилоят ва шаҳру ноҳияҳои он барои фаъолияти мунтазам ва самарабахш дар давраи тирамоҳу зимистони солҳои 2024-2025, аз ҷумла дар муассисаҳои соҳаҳои маориф, тандурустӣ, фарҳанг, нақлиёт, корхонаҳои саноатӣ, хоҷагии манзилию коммуналӣ, раёсати молия, ҷамъияти матлубот, шабакаҳои барқӣ ва ғайра мониторинг гузаронида шуда, гузориши дахлдор аз ҷониби Вазорати рушди иқтисод ва савдо ба Ҳукумати ҷумҳурӣ пешниҳод гардид.

Камбудиҳои зимни мониторинги гурӯҳи корӣ ошкоршуда ба иштирокчиёни ҷаласаи ситод аз ҷониби муовини якуми Вазорати рушди иқтисод ва савдо Ашурбой Солеҳзода пешниҳод шуданд.

Дар ҷаласа аз ҷониби роҳбарияти Мақомоти иҷроияи ҳокимияти давлатии вилояти Суғд ва шаҳру ноҳияҳо он ҳисобот манзур гардида, дар ҷараёни ҷаласа оид ба камбудию мушкилиҳои ҷойдошта дар ҳар шаҳру ноҳияҳои вилоят вобаста ба маблағгузорӣ барои харид ва захиранамоии маводи сӯхт, захираи маводи озуқаворӣ ва зиддилағжиш, омодагии иншооти энергетикӣ ва дигар масъалаҳо ибрози назар карда шуд.

Дар ҷамъбасти ҷаласа аз ҷониби муовини Сарвазири Ҷумҳурии Тоҷикистон — раиси Ситод Усмоналӣ Усмонзода дар назди вазорату идораҳои дахлдор ва Мақомоти иҷроияи ҳокимияти давлатии вилояти Суғд ва шаҳру ноҳияҳои он вобаста ба таъмини иҷрои нақшаи захираи маводи зарурӣ ва сари вақт омода намудани соҳаҳои иқтисодию иҷтимоӣ барои фаъолияти мунтазам ва самарабахш дар давраи тирамоҳу зимистони солҳои 2024-2025 вазифаҳо гузошта шуданд.

АКС: Вазорати рушди иқтисод ва савдои Ҷумҳурии Тоҷикистон