Дар Душанбе доир ба мусиқии Шашмақом барномаи фарҳангӣ доир шуд

ДУШАНБЕ, 02.01.2025. /АМИТ «Ховар»/. Дар Муассисаи давлатии «Китобхонаи миллӣ» бо ташаббуси шуъбаи адабиёт доир ба фарҳанг ва ҳунар бахшида ба фаъолияти эҷодии Арбоби барҷастаи мусиқии мардумӣ ва суннатӣ, оҳангсоз ва ромишгар Шоҳназар Соҳибов таҳти унвони «Устоди беназири мусиқии Шашмақом» маҳфили фарҳангӣ баргузор гардид. Дар ин хусус ба АМИТ «Ховар» дар Китобхонаи миллии Тоҷикистон хабар доданд.

Таъкид шуд, ки Шашмақом, ки яке аз мусиқиҳои қадимӣ ба ҳисоб рафта, дар миқёси байналхалқӣ нуфузу эътибори хоссаро доро гардидааст.  7 ноябри соли 2003 бахши фарҳангии Созмони Милали Муттаҳид — ЮНЕСКО Шашмақомро шоҳкории бузурги мусиқии ҷаҳонӣ ва ёдгори маънавии инсоният эълон намуд.

Дар рушду нумуи ин навъи мусиқӣ хизматҳои арзандаи Шоҳназар Соҳибов, Фазлиддин Шаҳобов, Бобоқул Файзуллоев зиёд буда, онҳо «Шашмақом»-ро ба адвор (нота) гузаронида, дар нашри панҷҷилдаи он  иштирок кардаанд.

Шашмақом санъати қадимии халқи тоҷик буда, аз мақомҳои Бузург, Рост, Наво, Дугоҳ, Сегоҳ ва Ироқ иборат аст. Устодони бузурги Шашмақом Шоҳназар Соҳибов, Бобоқул Файзуллоев, ва Фазлиддин Шаҳобов ин санъати аҷдодиро ба адвор кашида, ба таври хаттӣ пешниҳод намуданд ва Шашмақомро аз нав зинда гардониданд.

Ёдовар мешавем, ки Шоҳназар Соҳибов ҳамчун оҳангсоз дар ҷумҳурӣ бо асарҳои жанри суруд ва хор машҳур аст. Ба ин асарҳо ҳамеша оғози барҷастаи навои саршор аз самимият, садоқат ва мустақилият хос аст. Такнавозии фортепиании ин асарҳо бо асолат ва мантиқи худ фарқ мекунад. Шоҳназар Соҳибов яке аз оҳангсозони маъруфи сурудсарои тоҷик маҳсуб шуда, сурудҳои ӯ ба таври устувор ба репертуари коллективҳо ва сарояндагони касбӣ ворид гардидаанд. Аз байни ин сурудҳо метавон «Дар ҳаваси рӯи ту» (шеъри Ҳилолӣ), «Шарқи озод» (шеъри Б.Раҳимзода) ва дигаронро номбар кард.

АКС: Китобхонаи миллии Тоҷикистон