Дар натиҷаи таркиш дар Покистон 4 нафар ҳалок ва 32 нафар захмӣ гардид

ДУШАНБЕ, 06.01.2025 /АМИТ «Ховар»/. Бар асари таркиши автобуси мусофирбар, ки дар вилояти Балуҷистон- дар ҷанубу ғарби Покистон рух дод, чаҳор нафар ҳалок ва 32 нафар захмӣ шуданд. Дар ин хусус хабаргузории «Синхуа» бо такя ба расонаҳои маҳаллӣ хабар додааст, иттилоъ медиҳад АМИТ «Ховар».

Тибқи иттилои пешакӣ, корвоне, ки автобуси мусофирбар дар ҳайати он ҳаракат мекард, мавриди ҳамлаи гурӯҳи мусаллаҳ қарор гирифтааст.

Ба ҷои ҳодиса теъдоди зиёди пулис ва неруҳои амниятӣ равона карда шуданд. Дар айни замон тафтиши пурраи таркиш идома дорад.

Зарардидагон ба бемористон интиқол ёфта, вазъи панҷ нафари онҳо вазнин аст.

АКС аз бойгонӣ