Дар Туркия сардии ҳаво то 33 дараҷа расидааст

ДУШАНБЕ, 06.01.2025 /АМИТ «Ховар»/. Анадолуи Шарқӣ (Туркия) бо оғози соли нав ба давраи сардиҳои ғайримуқаррарӣ ворид шуд. Дар ин хусус агентии AЗЕРТАҶ хабар медиҳад.

Шаби 4 январ ақрабаки ҳароратсанҷҳо дар ноҳияи Текмани вилояти Эрзурум то ба ҳадди сардии рекордии 33 дараҷа паст фаромад.

Саридораи обуҳавошиносии Туркия деҳаи Гаҷиомери Эрзурумро сардтарин нуқтаи кишвар дар шабонарӯзи охир эълон намуд.

Дарёҳо ва кӯлҳо аз сармо ях баста буданд. Мақомот ба аҳолии маҳаллӣ тавсия доданд, ки бе зарурат хонаҳои худро тарк накунанд ва берун набароянд.

Дар ноҳияи Геле дар вилояти Ардахан ҳаво 28,8 дараҷа сард, дар ноҳияи Чайрли дар Эрзинҷон — 27,8 дараҷа хунук, дар ноҳияи Чалдирон дар Ван — 26,6 дараҷа сард ва дар Сариқамиш (Карс) — 22,1 дараҷа хунукӣ сабт шудааст.

Сардиҳои шадид дар минтақаҳои шарқии Туркия то 8 январ идома меёбанд.

АКС аз бойгонӣ