Дар Женева масъалаи ҳамкории Тоҷикистону Эрон дар самти нақлиёту логистика баррасӣ шуд

Февраль 14, 2025 18:00

ДУШАНБЕ, 14.02.2025 /АМИТ «Ховар»/. Вазири нақлиёти Ҷумҳурии Тоҷикистон Азим Иброҳим дар Женева бо Вазири роҳ ва рушди шаҳрдории Ҷумҳурии Исломии Эрон Фарзона Содиқ мулоқот намуд, ки зимни он мусоҳибон аз тақвияти ҳамкории Тоҷикистон ва Эрон, бахусус дар самти нақлиёту логистика изҳори қаноатмандӣ намуданд, иттилоъ медиҳад АМИТ «Ховар» бо истинод ба Вазорати нақлиёти Ҷумҳурии Тоҷикистон.

Вазирони ҳарду давлат ҳайатҳои Тоҷикистон ва Эронро дар ҷаласаи солонаи 87-уми Кумитаи нақлиёти дохилии Комиссияи иқтисодии Созмони Милали Муттаҳид барои Аврупо (КНД КИА СММ), ки аз 11 то 14 феврал дар пойтахти Швейтсария доир гардид, роҳбарӣ намуданд.

Хотиррасон мешавем, ки 16 январи соли 2024 Азим Иброҳим ва хонум Фарзона Содиқ дар Душанбе, дар ҳузури сарони ҳарду давлат Барномаи иҷрои ҳамкорӣ байни Вазорати нақлиёти Ҷумҳурии Тоҷикистон ва Созмони банодир ва дарёнавардии Ҷумҳурии Исломии Эрон дар рушди транзити бор аз тариқи бандари Чобаҳорро ба имзо расониданд.

Аз ин рӯ, роҳбарони мақомоти ваколатдори роҳу нақлиёти Тоҷикистон ва Эрон суҳбатро аз ҷараёни иҷрои ҳамин барнома оғоз намуданд.

Ҷониби Эрон изҳор дошт, ки омода аст барои эҷоди маркази нақлиётию логистикии Тоҷикистон дар бандари Чобаҳор, воқеъ дар қисмати ҷанубу шарқии ин кишвар замин ҷудо кунад ва ҳоло мунтазири ҳайатҳои расмию соҳибкории Тоҷикистон аст.

Гуфта шуд, ки ҳангоми ҳамлу нақли байналмилалии автомобилӣ аз тариқи низоми TIR Carnet (ҳуҷҷат барои боркашонии байналмилалӣ), ки Тоҷикистон ва Эрон аз он истифода мебаранд, зарурати гирифтани раводид барои ронандагони ҳарду давлат аз байн меравад.

Хонум Фарзона Содиқ ҳайати Тоҷикистонро ба ҷаласаи навбатии ТРАСЕКА, ки дар Эрон баргузор мегардад, даъват намуд ва гуфт, ки дар ин ҷаласа ҳамзамон лоиҳаи созишнома байни Эрон ва Чин баррасӣ мегардад.

«Зарур мешуморем, ки барои истифодаи транзитӣ аз қаламрави Тоҷикистон ин ҳуҷҷатро сеҷониба ба имзо расонем, зеро он ба манфиати ҳарсе давлат хоҳад буд. Фикр мекунем, ки барои расидан ба Чин, ки дар замони муосир яке аз тавлидкунандагони асосии молу маҳсулот, таҷҳизоту мошинҳо ва технологияҳо дар дунё ба шумор меравад, роҳ аз тариқи Тоҷикистон муносиб ва қобили эътимод хоҳад буд»,- афзуд Фарзода Содиқ.

Азим Иброҳим пешниҳоди ҷониби Эрон, аз ҷумла роҷеъ ба ҳамлу нақли автомобилӣ байни Тоҷикистон ва Эрон аз тариқи Афғонистон, барои чанд моҳ тамдид намудани рухсатномаҳои аз соли пешин боқимонда барои ҳамлу нақли бор ва сода гардонидани равуои мусофирон ба хотири рушди гардишгарӣ дар Тоҷикистон ва Эронро қобили қабул ва баррасии минбаъда бо мақомоти дахлдор шуморид.

Азим Иброҳим оид ба истифодаи қаламрави Тоҷикистон барои транзит ҷиҳати пайвастан ба Чин изҳори назар карда, гуфт: «Мо ба ҳалли ин масъала манфиатдор ҳастем, зеро онро ҳадафи стратегии худ қарор додаем».

Дар конфронси байналмилалии «Роҳ ба сӯи Тиён-Шон», ки моҳи майи соли 2024 дар Душанбе доир гардид, масоили таҳкими ҳамкории давлатҳо дар соҳаи роҳу нақлиёт баррасӣ шуда, инчунин вохӯрии кории вазирони нақлиёти давлатҳои аъзои Созмони ҳамкории Шанхай, гуфтушуниди вазирони нақлиёти давлатҳои Осиёи Марказӣ + Чин баргузор шуд. Яке аз мавзуъҳои муҳим барои Тоҷикистон, ки дар доираи конфронс баррасӣ шуд, масъалаи марбут ба таҳвили бор аз тариқи роҳи байналмилалии автомобилгарди «Душанбе — Кулма — сарҳади Чин» буд.

Барои фаъолсозии ин долони мултимодалӣ корҳои навсозӣ дар қитъаҳои гуногуни он, аз ҷумла дар нақби «Истиқлол» идома доранд ва имсол қисмате аз он ба анҷом мерасад. Вазири нақлиёти Тоҷикистон ҷониби Эронро барои истифода аз ин долон даъват намуд ва изҳори умед кард, ки ҳамкории ду давлати дӯст ва ҳамзабону ҳамфарҳанг дар соҳаи роҳу нақлиёт боз ҳам тақвият меёбад.

АКС: Вазорати нақлиёти Ҷумҳурии Тоҷикистон

Февраль 14, 2025 18:00

Хабарҳои дигари ин бахш

Рӯзи Президенти Тоҷикистон яке аз санаҳои муҳими тақвими сиёсию фарҳангии ҷумҳурӣ ба шумор меравад
Дар Фурудгоҳи байналмилалии Душанбе ба дастовардҳои даврони соҳибистиқлолии Тоҷикистон арҷ мегузоранд
АЗ СОЛИ БАЙНАЛМИЛАЛИИ ОБИ ТОЗА ТО РӮЗИ БАЙНАЛМИЛАЛИИ ЗЕҲНИ СУНЪИИ БЕХАТАР, ҲИФЗШУДА ВА БОЭЪТИМОД. Андешаҳо дар ин маврид
Зеҳни сунъӣ ба яке аз технологияҳои серталабтарини асри рақамӣ аз лиҳози истеъмоли неруи барқ табдил меёбад
Аз ноҳияи Ҷалолиддини Балхӣ ба Қазоқистону Русия лимӯ содирот карда мешавад
Дар Тоҷикистон нахустин маротиба Форуми байналмилалии саноати ангишт доир мегардад
Дар Шаҳринав нақшаи ҷамъоварии пахта 187,4 фоиз иҷро шуд
Дар ноҳияи Ҷалолиддини Балхӣ кишти тиромоҳӣ идома дорад
Дар Тоҷикистон Барномаи савдои электронӣ ба бахши муҳими иқтисодиёт табдил ёфтааст
«Муждаи зафар». Дар ноҳияи Ёвон дурнамои истеҳсоли пахта барзиёд иҷро гардид
Дар даврони соҳибистиқлолии Тоҷикистон ба соҳаи энергетика 30 миллиард сомонӣ равона гардид
АЗ ДАРТМУТ ТО ДУШАНБЕ. Зеҳни сунъӣ нисбат ба қоидаҳое, ки истифодаи онро танзим менамоянд, ба маротиб тезтар рушд мекунад