Тоҷикистон ва Узбекистон тасмим гирифтаанд, ки дар Душанбе корхонаи муштараки саноатӣ таъсис диҳанд

ДУШАНБЕ, 22.02.2025 /АМИТ  «Ховар»/. Масъалаҳои марбут ба тавсеаи ҳамкории дуҷонибаи истеҳсолӣ  ва таъсиси корхонаи  муштараки саноатӣ дар Тоҷикистон дар мулоқоти Сафири Фавқулода ва Мухтори Ҷумҳурии Тоҷикистон дар Ҷумҳурии Узбекистон Абдуҷаббор Раҳмонзода бо Директори генералии корхонаи шишабарории вилояти Фарғонаи Узбекистон  «Кварс» Акмалҷон Бӯриев  баррасӣ шуданд.

АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Узбекистон иттилоъ медиҳад, ки Абдуҷаббор Раҳмонзода ҳамроҳ бо коршиносон дар  ноҳияи Қуввасойи вилояти Фарғона дар корхонаи шишабарории «Кварс» бо фаъолияти корӣ ва тавлиди шиша дар ин коргоҳ шинос шуданд.

Ҳарду ҷониб ба мувофиқа расиданд, ки корҳои муқаддимотиро дар шаҳри Душанбе ба анҷом расонида, ба бунёди корхонаи муштарак иқдом гиранд. Интизор меравад, ки дар оянда дар Тоҷикистон боз як корхонаи пуриқтидори саноатӣ таъсис гардад.

    АКС: Сафорати Ҷумҳурии Тоҷикистон дар Ҷумҳурии Узбекистон