Дар ҷамоатҳои шаҳраку деҳоти шаҳри Турсунзода гулгардонии наврӯзӣ идома дорад

ТУРСУНЗОДА, 17.03.2025 /АМИТ «Ховар»/. Дар ҷамоатҳои  шаҳраку деҳоти  шаҳри Турсунзода бо иштироки ҷавонону кӯдакон маросими гулгардонии наврӯзӣ идома дорад.  Дар ин хусус  масъулини бахши кор бо ҷавонон ва варзиши шаҳри Турсунзода ба мухбири АМИТ «Ховар» Субҳониддини Маҳмуд иттилоъ доданд.

Маросими гулгардонӣ на танҳо ҷашни зебо, балки ифодаи эҳтиром ба табиат ва суннатҳои аҷдодӣ низ мебошад, ки имрӯзҳо бо шукуҳу шаҳомати хос таҷлил мегардад.

Гулгардонӣ яке аз оинҳои қадимии Наврӯз ба ҳисоб меравад, ки то имрӯз дар бисёр минтақаҳои Осиёи Марказӣ, махсусан дар Тоҷикистон, Узбекистон ва дигар кишварҳо нигоҳ дошта шудааст.

Ин маросим ба фарорасии баҳор ва эҳёи табиат рабт дорад. Одамон гулҳои зебо ва рангинро ҷамъ оварда, кӯчаю хонаҳои худро бо онҳо оро медиҳанд. Ин амал рамзи тозагӣ, зебоӣ ва эҳёи анъанаҳои ниёгон мебошад.

Занон ва духтарон либосҳои миллии рангоранг пӯшида, бо табассум ва шодӣ гулҳоро ба дӯстону хешовандон тақдим менамоянд. Одатан кӯдакон низ дар ин маросим фаъолона иштирок намуда, бо суруду рақсҳои наврӯзӣ фазоро шод ва идона мегардонанд.

Гулгардонӣ ҳамчунин рамзи дӯстӣ, ваҳдат ва самимият аст. Одамон бо тақдими гул дар соли нави аҷдодиямон ба ҳамдигар орзуҳои нек ва барору комёбӣ таманно менамоянд.

АКС: Бахши кор бо ҷавонон ва варзиши шаҳри Турсунзода