35-СОЛАГИИ ИСТИҚЛОЛИ ДАВЛАТӢ. Дар ноҳияи Спитамен бинои нави муассисаи таълимӣ бунёд мешавад

ДУШАНБЕ, 15.04.2025. /АМИТ «Ховар»/. Ба истиқболи 35-солагии Истиқлоли давлатӣ дар ноҳияи Спитамени вилояти Суғд бинои нави Муассисаи таҳсилоти миёнаи умумии №19 ва дар беморхонаи марказӣ бинои иловагӣ сохта, ба истифода дода мешавад. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.

Бинои Муассисаи таҳсилоти миёнаи умумии №19 бо назардошти афзоиши аҳолӣ ва мутобиқ набудани он ба талаботи замони муосир бунёд мешавад. Ин бино аз таҳхона ва се ошёна иборат буда, барои таълиму тарбияи 1224 хонанда дар ду баст пешбинӣ шудааст.

Фармоишгари иншоот Мақомоти иҷроияи ҳокимияти давлатии ноҳия Спитемен буда, бо саҳми шахсони саховатманд, соҳибкорон ва ташаббуси кумитаи падару модарон сохта мешавад. Дар айни замон дар Муассисаи таҳсилоти миёнаи умумии №19 612 хонанда таҳсил доранд.

Дар ноҳияи Спитамен инчунин сохтмони бинои иловагии беморхонаи марказӣ идома дорад. Бинои иловагӣ бо саҳми соҳибкорон ва дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сохта мешавад.

АКС: Хадамоти матбуоти Раиси вилояти Суғд