Дар Қазон Форуми байналмилалии энергетикии Тотористон – «ЭНЕРГОПРОМ-2025 ва намоишгоҳи «KazanEnergyExpo» доир гардид

ДУШАНБЕ, 03.04.2025 /АМИТ «Ховар»/. Яке аз афзалияти сиёсати иқтисодии Ҷумҳурии Тоҷикистон дастрасии кишварҳо ба энергияи тоза ва истифодаи самараноки захираҳои энергетикӣ маҳсуб мешавад. Ин нуктаро Вазири энергетика ва захираҳои оби Ҷумҳурии Тоҷикистон  Далер  Ҷумъа дар маросими ифтитоҳи Форуми байналмилалии энергетикии Тотористон – «ЭНЕРГОПРОМ-2025», ки дар шаҳри Қазони Федератсияи Русия баргузор гардид, иброз намуд. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Дар маросими ифтитоҳи Форуми байналмилалии энергетикии Тотористон – «ЭНЕРГОПРОМ-2025» Раиси Ҷумҳурии Тотористон Рустам Минниханов, вазири энергетикаи Федератсияи Русия Сергей Сивилёв, намояндагони вазоратҳои энергетикаи кишварҳои хориҷӣ, ширкатҳои бузурги истеҳсолкунанда ва таъминкунандагони таҷҳизот, корпоратсияҳо ва холдингҳои энергетикӣ иштирок намуданд.

Дар форум Вазири энергетика ва захираҳои оби Ҷумҳурии Тоҷикистон вобаста ба ҳамкории мутақобили судманд ва муносибатҳои дӯстонаи Ҷумҳурии Тоҷикистон ва Федератсияи Русия сухан намуда, гуфт, ки «ин форум на танҳо платформаи муҳими баррасии масъалаҳои мубрами соҳаи энергетика мебошад, балки марҳилаи муҳим дар ташаккули назари нав ба ояндаи технологияҳои энергетикӣ, рушди устувор ва навоварӣ ба шумор меравад».

Пас аз анҷоми маросими ифтитоҳ иштирокдорон намоишгоҳи «KazanEnergyExpo»-ро тамошо намуданд. Дар намоишгоҳ зиёда аз 90 ширкати соҳаи энергетика аз 17 минтақаи Русия ва чанд кишвари хориҷӣ иштирок намуда, дониш ва технологияҳои пешқадами худро муаррифӣ намуданд. Инчунин дар бораи лоиҳаҳои умедбахши такмили инфрасохтори энергетикӣ маълумот дода шуд.

АКС: Вазорати  энергетика ва захираҳои оби Ҷумҳурии Тоҷикистон