Дар мавзуи «Тоҷикистон – пешоҳанги ҳифзи пиряхҳо дар ҷаҳон» конференсияи байналмилалӣ доир шуд

ДУШАНБЕ, 29.05.2025 /АМИТ «Ховар»/. 28 май дар Китобхонаи миллии Тоҷикистон дар ҳошияи Конфронси байналмилалии сатҳи баланд оид ба ҳифзи пиряхҳо бо ташаббуси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар мавзуи «Тоҷикистон-пешоҳанги ҳифзи пиряхҳо дар ҷаҳон» конференсияи байналмилалии илмӣ-амалӣ баргузор шуд, хабар доданд ба АМИТ «Ховар» аз ин кумита.

Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ иброз дошт, ки дар имрӯз гармшавии ҳаво, обшавии пиряхҳо, хушк шудани чашмаю дарёчаҳои минтақаҳои аҳолинишин ва дигар пайомадҳои офатҳои табиӣ ба яке аз мушкилоти глобалӣ мубаддал гашта, ба иқтисодиёт ва ҳаёти мардуми осоиштаи дунё рӯз ба рӯз таъсири манфӣ мерасонанд. Дар Тоҷикистон манбаи асосии об пиряхҳо ва барфу борон ба ҳисоб мераванд.

«Пиряхҳо яке аз бойигариҳои беҳамто ва манбаи оби ошомидании сарзамини Тоҷикистон мебошанд. Майдони умумии пиряхҳо 8476,2 километри мураббаъ мебошад, ки қариб 6 дарсади масоҳати ҷумҳуриро ташкил медиҳад. Бинобар гармшавии иқлими сайёра давоми 30 соли охир дар Тоҷикистон 1300 пирях об шудааст. Муаммои тағйирёбии иқлим ва пайомадҳои он, бахусус обшавии босуръати пиряхҳо аз масъалаҳое мебошад, ки ҷомеаи ҷаҳон, аз ҷумла Тоҷикистонро нигарон намудааст. Оқибати ин тағйирёбӣ ба захираҳои обии Осиёи Марказӣ таъсир мерасонад ва он аллакай аз худ дарак додааст», — гуфт Фарҳод Раҳимӣ.

Аҳамияти пирях барои бо об таъмин намудани соҳаҳои гуногуни халқи мамлакат бузург аст. Қариб ҳамаи обҳое, ки дар ҳудуди Тоҷикистон ташаккул меёбанд, барои нӯшидан ва истифода дар соҳаи кишоварзӣ мувофиқ мебошанд. Дар минтақаи Осиёи Марказӣ, махсусан ҳудуди Тоҷикистон, ки яке аз манотиқи ба тағйирёбии иқлим осебпазир мебошад, бинобар сабаби баланд шудани ҳарорат, кам гаштани миқдори бориш ва дигар омилҳои метеорологӣ захираи пиряхҳо коҳиш меёбад.

Тоҷикистон таҳти роҳбарии Президенти мамлакат муҳтарам Эмомалӣ Раҳмон дар арсаи байналмилалӣ ҳамчун давлати ташаббускор дар соҳаи обу иқлим эътироф шудааст. Боиси хурсандист, ки ташаббуси панҷуми Тоҷикистон дар соҳаи об аз ҷониби Маҷмаи умумии Созмони Милали Муттаҳид бо қабули қатъномаи махсус тасдиқ шуда, тибқи ин қатънома, соли 2025 Соли байналмилалии ҳифзи пиряхҳо эълон гардид ва аз оғози соли 2025 ҳамасола 21 март ҳамчун Рӯзи ҷаҳонии пиряхҳо таҷлил мешавад.

Дар идома олимону коршиносони дохилӣ, инчунин олимони хориҷӣ аз Ҳиндустон ва Қазоқистон ба тариқи маҷозӣ маъруза намуданд.

Конференсия дар бахшҳои илмҳои табиӣ-техникӣ, сиёсӣ-иқтисодӣ, сайёҳӣ ва хизматрасонӣ дар муассисаҳои таълимии таҳсилоти миёнаи касбии шаҳри Душанбе идома ёфт. Дар он омӯзгорону кормандони илмии муассисаҳои таълимии таҳсилоти ибтидоӣ ва миёнаи касбии шаҳри Душанбе ва шаҳру ноҳияҳои тобеи ҷумҳурӣ маъруза намуданд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон