Маротибаи аввал дастаи мунтахаби Тоҷикистон оид ба ҷудо дар мусобиқаи Grand Slam соҳиби 11 медал ва ҷойи якум гардид

ДУШАНБЕ, 05.05.2025. /АМИТ «Ховар»/. Дар Мусобиқаи байналмилалии «Dushanbe Grand Slam 2025», ки аз 2 то 4 май дар Қасри теннис ва маҷмааи варзишҳои обии шаҳри Душанбе баргузор гардид, дастаи мунтахаби Тоҷикистон бо касби 11 медал (4 тилло, 3 нуқра ва 4 биринҷӣ) сазовори ҷойи якум гардид, иттилоъ медиҳад АМИТ «Ховар».  

Тавре аз Федератсияи байналмилалии ҷудо хабар доданд, дар мусобиқаи «Dushanbe Grand Slam 2025» 226 варзишгар (123 мард ва 103 зан) аз 27 давлати ҷаҳон иштирок намуданд.

Дар ин мусобиқаи сайри ҷаҳонии ҷудо, ки бори дуюм дар Душанбе баргузор шуд, ба ҳайати дастаи мунтахаби Тоҷикистон 36 варзишгар (28 мард ва 8 зан) дохил буд.

Дар ду рӯзи аввали мусобиқа варзишгарони тоҷик дар чор вазн байни мардон — 60 кг, 66 кг, 73 ва 81 кг; дар се вазн байни занон – 48 кг, 52 кг ва 57 кг рақобат карда, соҳиби 8 медал (3 тилло, 2 нуқра ва 3 биринҷӣ) шуданд.

Дар рӯзи аввал ва дуюми мусобиқа ҷудочиёни Тоҷикистон Меҳрзод Суфиев (дар вазни -60 кг) медали нуқра, Эмомалии Нуралӣ (дар вазни -66 кг) медали тилло, Обид Ҷебов (дар вазни -66 кг) медали нуқра, Ёсин Бобокалонов (дар вазни -66 кг ) медали биринҷӣ, Мадина Қурбонзода (дар вазин -52 кг) медали биринҷӣ, Муҳиддин Асадуллоев  дар вазни -73 кг медали тилло, Сомон Маҳмадбеков дар вазни -81 кг медали тилло ва Абубакр Шеров дар вазни -73 кг медали биринҷӣ ба даст оварданд.

Дар рӯзи охири мусобиқа ҷудочиёни Тоҷикистон Темур Раҳимов дар вазни +100 кг медали тилло, Ҷаҳонгир Маҷидов дар вазни -100 кг медали нуқра ва Кароматулло Ҳакимов дар вазни -100 кг медали нуқра ба даст оварданд.

Инчунин дар ин мусобиқа дастаи мунтахаби Озарбойҷон бо гирифтани 4 медал (2 тилло ва 2 нуқра) дар ҷойи дуюм ва дастаи мунтахаби Фаронса бо гирифтани 7 медал (2 тилло, 1 нуқра ва 4 биринҷӣ) дар ҷойи сеюм қарор гирифтанд.

Маблағи умумии ҷоизаҳои молии мусобиқа 154 ҳазор евроро ташкил дод. Ғолибон дар ҳар вазн (7 вазн байни мардон ва 7 вазн байни занон) бо 5000 евро, барандагони медали нуқра бо 3000 евро ва соҳибони медали биринҷӣ бо 1500 евро сарфароз гардонида шуданд.

Варзишгарон дар ин мусобиқаи байналмилалӣ дар баробари медалу ҷоизаҳои молӣ инчунин соҳиби имтиёзҳо дар феҳристи ҷаҳонии ҷудо шуданд. Аз ҷумла, ғолибони ҷойи якум 1000 имтиёз, ҷойи дуюм – 700, ҷойи сеюм – 500, ҷойи панҷум – 360, ҷойи ҳафтум – 260 имтиёз ба даст оварданд.

Ёдовар мешавем, ки соли 2024 дар аввалин мусобиқаи «Dushanbe Grand Slam 2025», ки бо иштироки 390 варзишгар аз 65 давлат доир гардид, паҳлавонони тоҷик 7 медал ба даст оварда буданд.

АКС: Федератсияи ҷудои Тоҷикистон