35-СОЛАГИИ ИСТИҚЛОЛИ ДАВЛАТӢ. Дар ноҳияи Рӯдакӣ сохтмони биноҳои нави муассисаҳои таълимӣ бо маром идома доранд

ДУШАНБЕ, 11.06.2025. /АМИТ «Ховар»/. Бахшида ба 35-солагии Истиқлолияти давлатии Ҷумҳурии Тоҷикистон дар деҳаи Хокалии Ҷамоати деҳоти Роҳатии ноҳияи Рӯдакӣ сохтмони бинои иловагӣ дар назди Муассисаи таҳсилоти миёнаи умумии №110 оғоз гардид.

Тавре аз Мақомоти иҷроияи ҳокимияти давлатии ноҳияи Рӯдакӣ ба АМИТ «Ховар» хабар доданд, бино аз ду ошёна ва 12 синфхонаи барҳаво иборат буда, дар як баст 480 нафар хонанда ба таҳсил фаро гирифта мешавад.

Бинои иловагӣ бо мақсади беҳтар гардонидани шароити таълим барои хонандагон ва аз байн бурдани мушкилоти ҷойи нишаст бунёд мегардад.

Рушди соҳаи маориф аз самтҳои муҳим ва афзалиятноки сиёсати иҷтимоии Ҳукумати Ҷумҳурии Тоҷикистон маҳсуб ёфта, дар партави дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон дар тамоми гӯшаву канори ноҳияи Рӯдакӣ сохтмони синфхонаҳои иловагӣ ва биноҳои нави муассисаҳои таълимӣ бо маром идома доранд.

АКС: Мақомоти иҷроияи ҳокимияти давлатии ноҳияи Рӯдакӣ