Ҳамкорӣ байни муассисаҳои таҳсилоти олии Тоҷикистон ва Узбекистон таҳким меёбад

ДУШАНБЕ, 21.06.2025. /АМИТ «Ховар»/. Байни Донишгоҳи давлатии Кӯлоб ба номи Абуабдуллоҳи Рӯдакӣ ва Донишкадаи соҳибкорӣ ва омӯзгории Деҳнави Ҷумҳурии Узбекистон созишномаи ҳамкорӣ ба имзо расид. Дар ин хусус ба АМИТ «Ховар» аз Донишгоҳи давлатии Кӯлоб хабар доданд.

Созишнома заминаи ҳуқуқиро барои густариши равобити илмӣ ва таълимии байни ду муассисаи таҳсилоти олӣ фароҳам оварда, роҳро барои татбиқи лоиҳаҳои муштарак боз менамояд.

Санади мазкур 20 июн дар доираи баргузории Форум ва Намоишгоҳи байналмилалии сайёҳии «Хатлон — қалби гарми сайёҳӣ» ва дар ҷараёни мулоқоти ректори Донишгоҳи давлатии Кӯлоб Мунир Сафарзода бо ректори Донишкадаи Деҳнав Ойбек Рузиев ба имзо расид.

Зимни мулоқот ҷонибҳо перомуни дурнамои ҳамкории дуҷониба табодули афкор намуда, самтҳои афзалиятноки фаъолияти муштаракро баррасӣ карданд. Аз ҷумла, мубодилаи устодону донишҷӯён, ташкили конференсияҳои илмии муштарак, татбиқи барномаҳои таҳсилотӣ ва таҳияи лоиҳаҳои ҳамоҳангшудаи тадқиқотӣ дар маркази таваҷҷуҳ қарор доштанд.

Дар идомаи вохӯрӣ ректори Донишгоҳи давлатии Кӯлоб, дотсент Мунир Сафарзода иброз доштанд, ки муассисаҳои таҳсилоти олӣ ҳамчун пайвандгари фарҳангу дониш метавонанд нақши муҳим дар таҳкими дӯстию ҳамгироии халқҳои минтақа дошта бошанд. Ӯ ҳамчунин таъкид намуд, ки ҳамкории байналмилалӣ, бахусус бо муассисаҳои кишварҳои ҳамсоя, аз бандҳои мақсадноки стратегияи рушди донишгоҳ ба шумор меравад.

Дар асоси созишнома ҷонибҳо ба мувофиқа расиданд, ки бо истифода аз муштаракоти таърихӣ, фарҳангӣ ва забонӣ, инчунин дар партави дастгирии роҳбарияти ҳар ду давлат, ҳамгироии илмӣ ва таълимиро ба сатҳи нав бароранд.

Таъкид гардид, ки чунин иқдомҳо ба таҳкими неруи кадрӣ, рушди иқтидори таҳқиқотӣ ва таҳкими робитаҳои дӯстона байни насли ҷавон дар фазои илмии минтақавӣ мусоидат менамоянд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ