Дар Душанбе вобаста ба таҳия намудани санади Гурӯҳбандии лоиҳаҳои «сабз» ҷаласаи Гуруҳи корӣ доир шуд

ДУШАНБЕ, 12.06.2025. /АМИТ «Ховар»/. 11 июн дар Вазорати рушди иқтисод ва савдо бо мақсади амалисозии ҳадафу вазифаҳои «Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037»  ва таҳия намудани санади Гурӯҳбандии (Таксономия)-и лоиҳаҳои «сабз» ҷаласаи Гурӯҳи корӣ бо иштироки коршиносони байналмилалӣ ва маҳаллӣ баргузор шуд. Дар ин хусус ба АМИТ «Ховар» аз Вазорати рушди иқтисод ва савдо хабар доданд.

Дар оғози ҷаласа муовини якуми Вазири рушди иқтисод ва савдо Ашурбой Солеҳзода вобаста ба ҳадафу вазифаҳои «Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037» ва зарурати қабули ин санад маълумот пешниҳод намуд.

Иброз гардид, ки Гурӯҳбандӣ (Таксономия)-и лоиҳаҳои «сабз» бо мақсади ҷалби сармояи «сабз» барои татбиқи лоиҳаҳои сармоягузории давлатӣ, пешниҳоди қарзҳои «сабз» ва таҳияи лоиҳаҳои ҷавобгӯ ба принсипҳои иқтисоди «сабз» таҳия мегардад.

Ҳамзамон дар ҷараёни ҷаласа аз ҷониби мушовири байналмилалӣ Оливер Ҳерманн рӯнамо оид ба моҳияти Таксономияи «сабз», таҷрибаи байналмилалӣ ва хусусияти ин ҳуҷҷат манзур гардид.

Дар доираи ҷаласа аз ҷониби намояндагони вазорату идораҳо ва мушовирон вобаста ба нақшаҳои минбаъда ва сохтори ҳуҷҷати таҳияшаванда мубодилаи афкор гардид.

АКС: Вазорати рушди иқтисод ва савдои Ҷумҳурии Тоҷикистон