Дар ноҳияи Рӯдакӣ 933 ҳолати қоидавайронкунии истифодаи неруи барқ ошкор карда шуд

ДУШАНБЕ, 30.06.2025 /АМИТ «Ховар»/. Дар ноҳияи Рӯдакӣ дар панҷ моҳи соли равон  933 ҳолати қоидавайронкунӣ дар  истифодаи неруи барқ сабт шудааст, ки зарари он беш аз 931 ҳазор сомониро ташкил медиҳад. Дар ин хусус зимни вохӯрии Раиси ноҳияи Рӯдакӣ Абдуғаффор Ҳикматуллозода бо роҳбарият ва кормандони Шабакаҳои тақсимоти барқи «Рӯдакӣ-2» иттилоъ дода шуд.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Рӯдакӣ хабар доданд, вохӯрӣ вобаста ба вазъи амалишавии қонунгузорӣ дар соҳаи энергетика, баррасии оморҳои мавҷуда дар самти истифодаи неруи барқ, пардохти маблағи хизматрасонӣ, коҳиши талафоти неруи барқ ва андешидани тадбирҳои қатъӣ барои пешгирии ҳуқуқвайронкуниҳо гузаронида шуд.

Раиси ноҳия вобаста ба муҳтавои тағйиру иловаҳо ба Кодекси ҷиноятӣ ва маъмурии Ҷумҳурии Тоҷикистон ибрози назар намуда, дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмонро оид ба масъалаи талафоти неруи барқ ба масъулин расонид.

Иттилоъ дода шуд, ки қарзи умумии муштариёни ноҳия дар назди шабакаҳои барқ беш аз 211 миллион сомонӣ буда, қисми зиёди он ба аҳолӣ ва корхонаҳо рост меояд.

Дар панҷ моҳи соли равон беш аз 257 миллион кВт/соат неруи барқ ба шабакаҳо интиқол ёфтааст, ки аз он 72 миллион кВт/соат талафоти тиҷоратиро ташкил медиҳад.

Ҳамчунин раиси ноҳия аз беогоҳ қатъ кардани неруи барқ ва зарари моддии расидан ба пойгоҳҳои обкашӣ изҳори нигаронӣ намуд.

Ёдовар мешавем, ки дар ноҳия бо мақсади баланд бардоштани маърифати ҳуқуқӣ ва пешгирии ҳолатҳои ғайриқонунӣ аз моҳи апрел  то инҷониб  гурӯҳҳои корӣ корҳои фаҳмондадиҳӣ ва машваратӣ мегузаронанд.

АКС: Мақомоти иҷроияи ҳокимияти давлатии ноҳияи Рӯдакӣ