Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт

ДУШАНБЕ, 28.06.2025 /АМИТ «Ховар»/ – Дар доираи омодагиҳо ба ҷашни 35-солагии Истиқлоли давлатии Ҷумҳурии Тоҷикистон дар Вилояти Мухтори Кӯҳистони Бадахшон (ВМКБ) бунёду азнавсозии 1362 иншооти иҷтимоиву истеҳсолӣ ба нақша гирифта шудааст. То ба имрӯз сохтмони 1059 иншоот ба маблағи беш аз 3,8 миллиард сомонӣ анҷом ёфта, 78 фоизи нақша иҷро гардидааст. Дар ин хусус имрӯз Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни суханронӣ дар мулоқот бо роҳбарон ва фаъолони вилоят иброз доштанд.

То имрӯз дар вилоят 80 корхонаву коргоҳи саноатӣ, 70 муассисаи таълимӣ, 46 иншооти соҳаи тандурустӣ, 74 иншооти варзишӣ, 29 маркази фарҳангӣ, 246 километр роҳ, 37 пул ва садҳо иншооти дигар мавриди истифода қарор гирифтаанд.

Сарвари давлат Эмомалӣ Раҳмон аз корҳои анҷомёфта изҳори қаноатмандӣ намуда, ба ҳамаи соҳибкорон, шахсони саховатпеша ва сокинони вилоят барои саҳми арзишманд дар рушди вилоят ва амалӣ намудани ташаббусҳои созандаи Ҳукумати мамлакат сипосу миннатдории самимӣ изҳор доштанд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»