Байни Тоҷикистон ва Муғулистон ду санади ҳамкорӣ дар соҳаи инноватсия ва технологияҳои рақамӣ ба имзо расид

ДУШАНБЕ, 25.07.2025 /АМИТ «Ховар»/. Тоҷикистон ва Муғулистон ҳамкориро дар бахши рақамикунонӣ тақвият медиҳанд. Дар иртибот ба ин дар доираи сафари давлатии Президенти Муғулистон Ухнаагийн Хурэлсух ба Ҷумҳурии Тоҷикистон Ёддошти тафоҳум байни Агентии инноватсия ва технологияҳои рақамии назди Президенти Ҷумҳурии Тоҷикистон ва Вазорати рушди рақамӣ, инноватсия ва алоқаи Муғулистон дар соҳаи рақамикунонӣ ва «Ёддошти тафоҳум байни Ҷамъияти саҳомии кушодаи «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ» — и назди Агентии инноватсия ва технологияҳои рақамӣ ва Корхонаи давлатии «Академияи Э-Муғулистон» ба имзо расонида шуд. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад.

Муқаррароти санадҳои баимзорасида ба роҳ мондани ҳамкорӣ доир ба рушди инноватсия ва гузариш ба раванди рақамӣ, дурнамои татбиқи ҳукумати электронӣ, аз ҷумла хизматрасониҳои давлатӣ дар шакли рақамӣ байни ҳарду ҷонибро дар назар дорад.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»