Масъалаи омода намудани мутахассисони соҳаи роҳи оҳан дар Тоҷикистон бо намояндагони Корея баррасӣ гардид

ДУШАНБЕ, 23.07.2025 /АМИТ «Ховар»/. 22 июл дар мулоқоти Ректори Донишгоҳи техникии Тоҷикистон ба номи академик Муҳаммад Осимӣ Қудрат Давлатзода ва намояндагони Донишгоҳи Вусонг (Woosong University) ва Роҳи оҳани миллии Корея ҷонибҳо густариши ҳамкорӣ дар соҳаи роҳи оҳанро таъкид намуданд.

Тавре АМИТ «Ховар» бо истинод ба Донишгоҳи техникӣ хабар медиҳад, дар вохӯрӣ ҷонибҳо масъалаҳои таҳкими муносибатҳои илмӣ, таълимӣ ва истеҳсолӣ, омода намудани мутахассисони соҳаи роҳи оҳан дар Тоҷикистон бо истифода аз таҷрибаи пешрафтаи Корея ва татбиқи лоиҳаҳои муҳим дар бахши нақлиёти роҳи оҳанро мавриди баррасӣ қарор доданд.

Иброз гардид, ки густариши ҳамкорӣ барои рушди босуботи соҳаи нақлиёти роҳи оҳан дар Тоҷикистон аҳамияти бузург дошта, барои пешрафти минбаъдаи муносибатҳои дӯстона ва шарикӣ байни Тоҷикистон ва Корея заминаи устувор фароҳам меорад.

АКС: Донишгоҳи техникии Тоҷикистон ба номи академик Муҳаммад Осимӣ