Дар Бӯстон ғолибони Озмуни ҷумҳуриявии «Фурӯғи субҳи доноӣ китоб аст» қадрдонӣ гардиданд

ДУШАНБЕ, 30.08.2025. /АМИТ «Ховар»/. Дар шаҳри Бӯстони вилояти Суғд  ғолибони даври шаҳрии Озмуни ҷумҳуриявии «Фурӯғи субҳи доноӣ китоб аст» қадрдонӣ гардиданд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Бӯстон иттилоъ доданд.

Дар даври шаҳрии озмун 214 довталаб иштирок намуда, 67 нафар ба даври вилоятӣ роҳхат гирифт. Дар даври вилоятии озмуни аз шаҳри Бӯстон 8 нафар ба даври ҷумҳуриявӣ роҳхат ба даст овард.

Давоми 7 сол таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон бо мақсади эҳёи суннатҳои неки аҷдодӣ, оммавигардонӣ ва тарғиби китобу китобхонӣ озмунҳои ҷумҳуриявӣ баргузор карда мешаванд.

Озмуни ҷумҳуриявии «Фурӯғи субҳи доноӣ китоб аст» бо мақсади баланд бардоштани завқи китобхонӣ, ташаккули неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллии фарҳангӣ, инкишофи қобилияти зеҳнӣ, таҳкими эҳсоси худогоҳию худшиносӣ, заҳираи луғавӣ ва тақвияти маънавии аҳолии мамлакат доир мегардад.

АКС: Мақомоти иҷроияи ҳокимияти давлатии шаҳри Бӯстон