Дар осоишгоҳи «Бунёд»-и ноҳияи Ашт шароити хуби ташхису табобати беморон фароҳам оварда мешавад

ДУШАНБЕ, 11.08.2025 /АМИТ «Ховар»/. Ба муносибати 35-солагии Истиқлоли давлатии Ҷумҳурии Тоҷикистон биноҳои асосии осоишгоҳи «Бунёд»-и ноҳияи Ашт ба истифода дода мешаванд. Дар ин хусус Сартабиби осоишгоҳи «Бунёд»-и ноҳияи Ашт Шуҳрат Маҳмадалӣ иттилоъ дод.

Тавре сартабиб иброз дошт, дар осоишгоҳи «Бунёд» табобат асосан бо лойқаи табии кӯли Аксикони ноҳияи Ашт анҷом дода мешавад. Табобатгирандагон дар моҳҳои июн, июл, август ва сентябр ба осоишгоҳ омада, бемориҳои худро муолиҷа мекунанд. Дар айни замон дар осоишгоҳ нафарони зиёд ба табобат фаро гирифта шудаанд, ки аксаран аз кишварҳои ҳамсоя мебошанд. Пас аз пурра ба истифода додани биноҳои асосӣ дар осоишгоҳ имкони қабули шаҳрвандон дар тамоми фаслҳои сол фароҳам оварда мешавад.

Дар табобатгоҳ асосан бемориҳои тарбод, системаи асаб, остреохондрози сутунмуҳра, буғумҳо ва якчанд намуди невриту невралгия табобат карда мешавад.

«Оби шуркули Аксикон давобахши бемориҳои пӯст, аз ҷумла псориаз, экзема ва бемориҳои замбуруғӣ ба ҳисоб меравад. Обу ҳавои Аксикон барои бемориҳои роҳи нафас ва бронхити аллергӣ низ манфиати зиёд дорад. Табобат дар асоси лойқаи табиӣ анҷом дода мешавад. Ҳамзамон дар табобатгоҳ ҳуҷраҳои физиотерапевтӣ бо таҷҳизоти муосир фаъолият доранд», — изҳор намуд Шуҳрат Маҳмадалӣ.

Лойқаи табиии Аксикон бо микроэлементҳои гуногун бой буда, дар таркиби он фосфор, флор, магний, калий, натрий ва сулфур мавҷуд мебошад.

«Дар осоишгоҳ қариб 3 ҳазор дарахти ороишӣ ва сояафкан шинонида шудааст. Роҳбарияти осоишгоҳ минбаъд низ кӯшиш мекунад, ки барои табобатгирандагон тамоми шароитро фароҳам орад», — гуфт сартабиб Шуҳрат Маҳмадалӣ.